Պաշտոնյան պետք է կարողանա ինքնուրույն որոշում կայացնել, չի կարելի հանրաքվեներով պատասխանատվությունը ժողովրդի վրա գցել. Վասակ Դարբինյան (տեսանյութ)
Եթե այդքան շատ հայտարարում են հանրաքվեի մասին, ինչ-որ մի տեղ դա վերածվում է անհամության: Պաշտոնյան պետք է կարողանա ինքնուրույն որոշում կայացնել, չի կարելի անընդհատ պատասխանատվությունը գցել ժողովրդի վրա: Tert.am-ի հետ զրույցում նման կարծիք հայտնեց լրագրող, մի շարք լրատվամիջոցների խմբագիր Վասակ Դարբինյանը:
«Ես չեմ բացառում, որ ինչ-որ հարցեր կարող են որոշվել հանրաքվեների միջոցով, բայց եթե այդքան շատ արտահայտվում են հանրաքվեի մասին, ինչ-որ մի տեղ դա վերածվում է անհամության: Չեմ կարծում, որ յուրաքանչյուր հարցի շուրջ որոշում կայացնելու համար պետք է հանրաքվե անել: Դա ճիշտ աշխատելաոճ չեմ համարում»,- նշեց Վ. Դարբինյանը:
Ըստ նրա՝ պետական պաշտոնյան, իշխանության ներկայացուցիչը, պետք է կարողանա ինքնուրույն որոշում կայացնել և անընդհատ ժողովրդին հղում պետք է չանի:
Վարչապետ Նիկոլ Փաշինյանը բազմիցս նշել է այս կամ այն հարցը հանրաքվեներով որոշելու մասին՝ թե՛ համայնքային, թե՛ հանրապետության մասշատաբով: Քաղաքապետ Հայկ Մարությանը ևս անդրադառնալով «Կարմիր գծերի», տրանսպորտի գնի հարցերին, ասել էր, որ դրանք պետք է լուծվեն հանրաքվեներով: Թերևս, հանրությանը դիմելու ամենաթարմ օրինակը օդանավակայանի անվանափոխության հարցն է. մշակույթի նախարարությունը «Զվարթնոց» օդանավակայանը Շառլ Ազնավուրի անունով վերանվանելու վերաբերյալ հանրային քննարկում էր կազմակերպել՝ դրա միջոցով պարզելու հանրության գերակշիռ մասի տեսակետը:
Վասակ Դարբինյանը խիստ բացասական վերաբերմունք ունի օդանավակայանի անվանափոխմանը, իսկ հանրային քննարկումը, ըստ նրա՝ միանգամայն ավելորդ է:
Նրա կարծիքով՝ տվյալ հարցում բացարձակապես կարևոր չէ, թե ինչ տեսակետ ունի «հանրության գերակշիռ մասը». «Գոնե մշակութային հարցերում այս ամբոխահաճությունը ոչ մի լավ տեղ չի տանում»:
«Նիկոլ Փաշինյանը ժողովրդական ալիքի վրա եկավ իշխանության և դա իր հաղթաթուղթն է, իր անխոցելիության առաջին վկայությունն ու փաստարկն է: Ինչ-որ տեղ ես հասկանում եմ իր դիրքորոշումը, բայց դա երկար չի կարող շարունակվել, ժամանակի ընթացքում շատ ջրեր կպարզվեն և այն հարցերում, որտեղ իսկապես պետք է որոշում կայացվի, բնականաբար, անընդհատ ժողովրդին հղում անելով չի լինելու: Այդպես չի կարող գոյատևել որևէ իշխանություն»,- նշեց Վ. Դարբինյանը:
Ինչ վերաբերում է հանրաքվեների մասին խոսող քաղաքապետին և մնացած պաշտոնյաներին, Վասակ Դարբինյանն ասաց. «Նրանք պետք է շատ արագ սթափվեն և կարողանան իսկապես իրենք որոշումներ կայացնել: Չի կարելի անընդհատ պատասխանատվությունը գցել ժողովրդի վրա»:
Նրա կարծիքով՝ արդեն ընտրված, ժողովրդի վստահության քվեն ստացած պաշտոնյաներն իրենք պետք է որոշումներ կայացնեն:
Վ. Դարբինյանը նաև նկատեց, որ կան հարցեր, որտեղ միակ տարբերակը հանրաքվեն է, մասնավորապես, խոսքը Արցախյան հիմնախնդրի մասին է: Լրագրողի խոսքով՝ որևէ իշխանավոր պետք է համարձակություն, վստահություն չունենա, որ Արցախի հարցում իր որոշումը ամենաճիշտն է և չի քննադատվելու ժողովրդի կողմից: Սակայն այլ պետք է լինի պաշտոնյաների դիրքորոշումը մշակութային ոլորտին վերաբերող հարցերի դեպքում:
«Մենք մի խոշոր մոլորության մեջ ենք, որ ժողովրդի պահանջով ենք առաջ շարժվում: Ժողովուրդը սիրում է այսինչ սերիալը և պետք է դա նկարահանվի, ժողովուրդը սիրում է ռաբիս երաժշտություն, ուրեմն պետք է հսկայական դահլիճներ տրամադրվեն ռաբիս երգիչներին: Իբր վկայակոչելով ժողովրդի պահանջարկը՝ մենք մշակույթը հավասարեցրել ենք գետնաքարշ վիճակի: Մեզ մոտ արժեքներն իսկապես ոտնահարվել են: Մենք ունենք մի հասարակություն, որը ոչ ցանկալի կրթական մակարդակ ունի, մեր հասարակությունն իր որակով, ցավոք սրտի, բավականին ցածր է»,- ասաց նա:
Ըստ Վասակ Դարբինյանի՝ սրա պատճառներից մեկը և՛ մշակույթի, և՛ լրագրության ոլորտներում, և՛ կառավարման համակարգում միշտ հետ մնալը ու պահանջարկին ապավինել են եղել:
«Այս ամեն ինչը մի հիմք ունի, դա պոպուլիզմ ասվածն է, որը շատ ավերածություններ է գործում: Հանրային գերակա շահ ձևակերպման անվան տակ, թե իբր հանրության շահերով են առաջնորդվում իշխանությունները, բայց ըստ էության՝ գործում էին հանրության շահերին հակառակ: Ընդհանրապես ժողովրդահաճո ներկայանալը ոչ մի լավ տեղ չի տանում: Մի դեպքում դա պատասխանատվությունը սեփական ուսերից թոթափելու դրսևորում է, մյուս կողմից դեմագոգիա»,- ընդգծեց նա:
Վ. Դարբինյանի կարծիքով՝ ներկայիս իշխանությունների գործելաոճում ևս կան պոպուլիզմի նախանշանները, բայց դա տևական կարող է լինել: Առաջիկա խորհրդարանական ընտրություններից հետո կառավարությունում կտրուկ փոփոխություններ կլինեն. «Կմնան պատասխանատու դիրքերում այն մարդիկ, որոնք իսկապես ի շահ ժողովրդի որոշում կկայացնեն, բայց ժողովրդին չեն չարչարի: Չեն ստիպի, որ ժողովուրդն իրենց փոխարեն մտածի՝ ինչ որոշում կայացնել»:
Դիմակավորված և զինված անձանց կողմից Փաշինյանի հասցեին սպառնալիքներ պարունակող տեսանյութի առնչությամբ...
ՌԴ պետական ռեեստրում Նարեկ Կարապետյանը նշված է որպես ՌԴ քաղաքացի
Հազա՛ր ամոթ. ՀՌՀ նախագահը՝ նախընտրական քարոզչության անվան տակ տարածվող հայատյաց բովանդակության մասին
Շակիրան Իսպանիայի կառավարությունից 55 միլիոն եվրո հարկային վերադարձ է ստացել
Տարածքային զիջումներից Զելենսկու հրաժարվելու պատճառով բանակցությունները փակուղի են մտել. Պենտագոն
Մեկնարկում է 2026-ի «100 գաղափար Հայաստանի համար» մրցույթի հայտերի ընդունման փուլը
Հրաժեշտի հանդիսավոր արարողություն ֆրանսիացի հարձակվող Անտուան Գրիզմանի համար
Մասիսում հրդեհի հետևանքով կան զnհեր ու վիրավորներ
Ադրբեջանը անկեղծ շահագրգռված է Հայաստանի հետ հակամարտության դադերցմամբ. Բայրամով
ԱՄՆ-ն համաձայնել է սառեցնել Իրանի դեմ պատժամիջոցները.Tasnim