Ադրբեջանում հայտնել են ահաբեկչություն նախապատրաստող արմատականներին ոչնչացնելու մասին

Ադրբեջանի պետական անվտանգության ծառայությունը հայտարարել է Գյանջայում 2 արմատականների ոչնչացման մասին, գերատեսչության տվյալներով՝ նրանք երկրում ահաբեկչություն են նախապատրաստել, հայտնում է «ՌԻԱ Նովոստի»-ն։

«Պետական անվտանգության ծառայությունը անհետաձգելի օպերատիվ միջոցներ է ձեռնարկել այն տեղեկության հաստատումից հետո, որ արմատական կրոնական-ծայրահեղական խմբավորման անդամներ Ֆամիլ Ֆազիլ օղլու Ալեկպերովն ու Ռուստամ Ռաֆայել օղլու Ռզաեւը զենք եւ պայթուցիկ սարքեր են ձեռք բերել եւ ծրագրում են ահաբեկչական գործողություններ իրականացնել երկրում»,- «ՌԻԱ Նովոստի»-ին հայտնել են Պետական անվտանգության ծառայության Հասարակայնության հետ կապերի կենտրոնում։

Գերատեսչությունում հայտնել են, որ այսօր Գյանջայում ահաբեկիչներին զինաթափելու գործողության ժամանակ կանգնեցվել է մեքենան, որում Ռուստան Ռզաեւն ու Ֆամիլ Ալեկպերովն են եղել։

«Ահաբեկիչները զինված դիմադրություն են ցույց տվել եւ կրակ բացել։ Պատասխան գործողությունների ժամանակ Ռուստան Ռզաեւն ու Ֆամիլ Ալեկպերովը սպանվել են»,-նշել են ծառայությունում։

Նշվում է նաեւ, որ դեպքի վայրի զննության ժամանակ հայտնաբերվել եւ առգրավվել է մեկ «Կալաշնիկով» տեսակի ինքնաձիգ, F1 տեսակի նռնակ, երեք տրոտիլային գլանիկ, որոնցից յուրաքանչյուրը 200 գրամ է կշռել, պայթուցիկներին ամրացված են եղել երեք էլեկտրոնային դետոնատորներ:

Պետական անվտանգության ծառայությունում հայտնել են, որ հարուցվել է քրեական գործ, օպերատիվ քննչական միջոցառումները շարունակվում են։

Լուրեր Հայաստանից - NEWS.am