Վրաստանի խորհրդարանի պատգամավորն ու նրա եղբայրն Ախալքալաքում ծեծի են ենթարկել ընդդիմադիր թեկնածուի շտաբի պետին ու անդամներին

Վրաստանի նախագահական ընտրություններից երկու օր անց՝ հոկտեմբերի 30-ին, Ախալքալաքում երկու միջադեպ է գրանցվել, որոնց հետևանքով մարմնական վնասվածքներ է ստացել չորս անձ:

Առաջին միջադեպը գրանցվել է Վրաստանի խորհրդարանի պատգամավոր Հենզել Մկոյանի մասնակցությամբ, երկրորդ միջադեպը՝ նրա եղբոր, ազգականների:

Վնասվածքներով հիվանդանոցի վերակենդանացման բաժանմունք են տեղափոխվել ընդդիմադիր թեկնածու Գրիգոլ Վաշաձեի՝ Ախալքալաքի շտաբի ղեկավար Աշոտ Ռաիսյանը և կուսակցության համակիրներ Աբրահամ Աբրահամյանը, Տիգրան Աբրահամյանը, Միշա Աղաբաբյանը:

Այս մասին Tert.am-ի հետ զրույցում ասաց «Ազգային շարժում» ընդդիմադիր կուսակցության Ախալքալաքի նախընտրական շտաբի ղեկավար Աշոտ Ռաիսյանի հայրը՝ Մելիք Ռաիսյանը, ով Վրաստանի խորհրդարանի նախկին պատգամավոր է:

«Ընտրություններից հետո՝ հոկտեմբերի 30-ին, երկու միջադեպ է գրանցվել: Առաջին միջադեպը եղել է Խոսպիո գյուղի ճանապարհին, երբ 4 մեքենայով շրջափակել են շտաբի մեքենան: Շրջափակողների մեջ է եղել նաև Վրաստանի իշխող խմբակցության պատգամավոր Հենզել Մկոյանը, ում դիմել են, որ միջադեպ տեղի չունենա, սակայն Հենզել Մկոյանը հակառակն է արել, ասել է՝ սատկացրե՛ք: Ինքը հարվածներ է հասցրել, իսկ հետո զանգել և ասել է, որ ինքը նման բան չէր անի։

20 րոպե անց եկել են Ախալքալաք՝ շտաբի մոտ, այս անգամ Հենզել Մկոյանի եղբոր գլխավորությամբ, և ատրճանակի կոթով, երկաթներով հարվածներ հասցրել, վնասվածքներ պատճառել որդուն և մյուս երեք տղաներին»,- ասաց Ռաիսյանը:

Հարցին, թե հիմա որտեղ են գտնվում վնասվածք ստացածները, Մելիք Ռաիսյանն ասաց, որ սկզբում տեղափոխվել են Ախալքալաքի հիվանդանոց, այնուհետև՝ Թբիլիսի, որովհետև իրանց առողջական վիճակը վատացել է, այժմ գտնվում են վերակենդանացման բաժանմունքում:

 Մելիք Ռաիսյանը նաև հայտնեց, որ ծեծկռտուքից հետո, երբ Ռաիսյանն ու մյուսները տեղափոխվել են Ախալքալաքի հիվանդանոց, նրանց այցելել է Վրաստանի նախագահի ընդդիմադիր թեկնածու Գրիգոլ Վաշաձեն, նրա շտաբի պետ Գրիգորի Վաշաձեն ու կուսակցության քարտուղարը:

«Նրանք այցելեցին տուժածներին, Գրիգոլ Վաշաձեն կոչ արեց ՆԳՆ-ին ընթացք տալ գործին շատ շտապ և օրենքով սահմանված կարգով ենթարկել խիստ պատասխանատվության»,-ասաց Ռաիսյանը:

Բացի դրանից, նա հայտնեց, որ Հայաստանում Վրաստանի դեսպանատանը դիտորդական առաքելություն իրականացնող որդուն էլ այսօր վրաց սահմանապահները 1 ժամից ավելի պահել են հայ-վրացական սահմանին գտնվող Նինոծմինդա սահմանային անցակետում առանց հիմնավորման, այնուհետև թողել, որ վերադառնա Վրաստան:

Բացի դրանից, Tert.am-ը Վրաստանի Ներքին գործերի նախարարությունից տեղեկացավ, որ Ախալքալաքում տեղի ունեցած ծեծկռտուքի փաստով հարուցվել է քրեական գործ:

««Ուժը միասնության մեջ է» քաղաքական դաշինքի շտաբի մոտակայքում զանգվածային ծեծկռտուքի դեպքի առթիվ հարուցվել է քրեական գործ Վրաստանի քրեական օրենսգրքի 239-րդ հոդվածի 2-րդ և 3-րդ մասերի հատկանիշներով՝ հրազենով կամ այլ զենքի տեսքով օգտագործված առարկայով կատարված կանխամտածված խուլիգանություն»,- հայտնեցին Վրաստանի ՆԳՆ-ից:

Նշենք, որ Վրաստանում նախագահի թեկնածուներից և ոչ մեկին չի հաջողվել 50% ձայն հավաքել, և հետևաբար կկայանա ընտրությունների 2-րդ փուլ:

Վրաստանում կիրակի անցկացված նախագահական ընտրությունների արդյունքում նախագահի անկախ թեկնածու Սալոմե Զուրաբիշվիլին, ում աջակցում է երկրում իշխող «Վրացական երազանք» կուսակցությունը, հավաքել է 38.6% ձայն, ընդդիմության թեկնածու Գրիգոլ Վաշաձեն հավաքել է 37,75% ձայն:

Այս թեմայով Սահակաշվիլիի կողմնակիցները Իվանիշվիլիից պահանջել են ծնկի գալ եւ ներում հայցել Թբիլիսիում ցուցարարները փորձել են ներխուժել խորհրդարան, իրավիճակը լարված է (տեսանյութ) Վրաստանում պետությունը կշարունակի օգնել փոքր ու միջին հյուրանոցներին Վրաստանը չի կարող բացել սահմանը Հայաստանից զբոսաշրջիկների համար Վրաստանում հաստատվել է կորոնավիրուսով վարակման 2 դեպք