Թուրքմենստանի նախագահը կես մլն եվրոյով մեքենա է գնել և անձամբ հավաքել այն սեփական գծագրի համաձայն (տեսանյութ)

Մրցարշավային Mini Cooper ավտոմեքենան, որով Թուրքմենստանի նախագահ Գուրբանգուլի Բերդիմուհամեդովը պատրաստվում էր «Ամուլ-Խազար 2018» ավտոմրցարշավին, ձեռք է բերվել 520 հազար եվրոյով:

Այս մասին գրում է Lenta.ru-ն՝ նշելով, որ տեղի լրատվամիջոցներն ուշադրություն են հրավիրել Թուրքմենստանի պետական բորսայի տվյալներին: Տրանսպորտային միջոցը ձեռք է բերվել այս տարվա հունիսի 7-ին: Երկրի ղեկավարի մասնակցությամբ փորձնական մրցելույթը տվյալ մեքենայով հեռարձակել էր տեղական հեռուստատեսությունը:

Բացի դրանից, հաղորդվում էր, որ մեքենան գնելուց 12 օր անց Բերդիմուհամեդովն անձամբ վերամշակել և իր սեփական գծագրերի հիման վրա հավաքել է գերարագ սպորտային ամենագնացը:

Բերդիմուհամեդովի ձեռքով հավաքված ավտոմեքենան վերջին անգամ հեռուստատեսությամբ ցուցադրվել է օգոստոսին: