Թուրքերը նորից խուզարկել են Սաուդյան Արաբիայի հյուպատոսարանը

  Թուրք քննիչներն այսօր նորից մուտք են գործել Ստամբուլում Սաուդյան
Արաբիայի հյուպատոսարանի տարածք, որտեղ երեկվանից խուզարկություն են
կատարում՝ փորձելով տեղեկություններ հայթայթել սաուդցի ընդդիմադիր լրագրող
Ջամալ Խաշոջիի առեղծվածային անհետացման մասին:

Սաուդյան Արաբիայի ռեժիմի քննադատ Խաշոջին հոկտեմբերի 2-ին այցելել է հյուպատոսարան, և դրանից հետո նրա մասին որևէ տեղեկություն չկա:
Թուրք իրավապահները համոզված են, որ հյուպատոսարանում լրագրողին
հարցաքննել են և մարմինը մասնատելով՝ սպանել: Թուրքերն ընդգծում են հենց
այդ դաժան հանգամանքը՝ ոչ թե սպանել են ու մասնատել, այլ մասնատելով են
սպանել, և այդ սարսափելի կտտանքը տևել է 7 րոպե:

Ըստ թուրքերի, սպանությունից հետո սաուդցի-քիլերների խումբը դիակի մասերը, ենթադրաբար, դուրս է հանել հյուպատոսարանի տարածքից:
Թուրք քննիչների համոզմամբ, լրագրողին սպանելու համար Սաուդյան
Արաբիայից Ստամբուլ մասնավոր օդանավով ժամանել է հատուկ թիմ, որի կազմում
15 անդամ է եղել:

Ենթադրվում է, որ նրանք կապեր ունեն Սաուդյան Արաբիայի թագաժառանգ
Մուհամադ բին Սալմանի հետ, ով, ամենայն հավանականությամբ, ոչ հեռու
ապագայում կփոխարինի 82-ամյա հորը՝ թագավոր Սալմանին:

Քիլերների խումբը, որի կազմում էին անվտանգության ծառայության անդամներ,
զինծառայողներ, քննիչներ և նույնիսկ մեկ դատական բժիշկ՝ բոլորը
դիվանագիտական անձնագրերով, սպանությունից հետո անմիջապես վերադարձել է
հայրենիք:

Սաուդյան Արաբիան կտրականապես հերքում է ընդդիմադիր լրագրողին սպանելու մեղադրանքը:
Սաուդյան Արաբիան ԱՄՆ-ի կարևոր գործընկերն է տարածաշրջանում և մտադիր է
առաջիկայում 450 միլիարդ դոլարով գնել ամերիկյան արտադրության տարբեր
ապրանքներ ու սարքավորումներ և 110-ը միլիարդ դոլարով գնել զենք ու
զինամթերք:

Ըստ նախագահ Դոնալդ Թրամփի, այդ հսկայական գումարն աննախադեպ է
ոչ միայն Սաուդյան Արաբիայի և ԱՄՆ-ի, այլև ամբողջ աշխարհի առևտրի
պատմության ընթացքում: Բայց մյուս կողմից ամերիկացիները չեն կարող անտեսել
ամերիկյան և համաշխարհային հանրության զայրույթը լրագրողի անհետացման
հարցում:

Միացյալ Նահանգների նախագահ Դոնալդ Թրամփը հեռախոսազրույց է ունեցել
թագավոր Սալմանի հետ: Ըստ Թրամփի, թագավորը հավաստիացրել է, թե ոչ մի
տեղեկություն չունի լրագրողի մասին և խոստացել է, որ Սաուդյան Արաբիայի
իրավապահներն ըստ ամենայնի կաջակցեն թուրք գործընկերներին:

Թրամփը պետքարտուղար Մայք Փոմփեոյին գործուղել է տարածաշրջան: Փոմփեոն
Էր-Ռիադում հանդիպել է և՛ թագավորի, և՛ թագաժառանգի հետ, ինչից հետո մեկնել
է Թուրքիա, որտեղ հանդիպել է նախագահ Ռեջեփ Թայիբ Էրդողանի և
արտգործնախարար Մևլութ Չավուշօղլուի հետ:
Փոմփեոյի փոխանցմամբ, թագավորը և թագաժառանգը խոստացել են աջակցել հետաքննությանը:

Թուրք քննիչները խուզարկություններ են անցկացրել ոչ միայն
հյուպատոսարանի շենքում, այլև համալիրի մաս կազմող այգու տարածքում,
ստուգել են մեքենաները և վերցրել ինչ-որ նյութերի նմուշներ: Թուրքերը չեն
ասում, թե խոսքը ինչ տեսակինյութերի մասին է:

Ուշագրավ է, որ Ստամբուլում Սաուդյան Արաբիայի հյուպատոս Մուհամադ ալ-Օթայբին հոկտեմբերի 16-ին հայրենիք է վերադարձել:
Թուրքերը պնդում են, որ ունեն լրագրողի սպանության փաստը հաստատող
աուդիո-վիզուալ ինֆորմացիա: Նախագահ Թրամփն ասել է, թե ամերիկացիներին
անհրաժեշտ են այդ ապացույցների կրկնօրինակները և հույս է հայտնել, որ
պետքարտուղարը դրանք իր հետ կբերի Վաշինգթոն:

Մինչդեռ, «Ենի Շաֆաք» իշխանամետ թուրքական պարբերականն այսօր շատ
հետաքրքիր լուր է հայտնել՝ Սաուդյան Արաբիայի մայրաքաղաք Էր-Ռիադում
ճանապարհային կասկածելի վթարից զոհվել է օդուժի սպա Սաադ ալ-Բուսթանին, ով
քիլերների խմբի կազմում հոկտեմբերի 2-ին ժամանել է Ստամբուլ և, ամենայն
հավանականությամբ, ներկա է եղել լրագրողի սպանությանը: