Ադրբեջանն ու Իսրայելը նոր անօդաչու թռչող սարք են արտադրում

Ադրբեջանը Pegasus 120 նոր անօդաչու թռչող սարքի արտադրություն է սկսել: Նոր անօդաչուն արտադրվում է իսրայելական Aeronautics ընկերության հետ համատեղ՝ Azad Systems ձեռնարկությունում, գրում է «Թրենդ» գործակալությունը:

Pegasus 120-ն ունակ է տեղափոխել մինչև 75 կգ ծանրության ռազմական ու քաղաքացիական նշանակության բեռ՝ մինչև 40 կմ հեռավորության վրա: Անօդաչուն կարող է թռիչք իրականացնել բեռի հետ միասին՝ օդում մնալով 45 րոպե:

Pegasus 120-ը ցուցադրության է հանվել Ադրբեջանում անցկացվող ADEX-2018 միջազգային պաշտպանական ցուցահանդեսում: Դրան մասնակցում է 224 ընկերություն՝ աշխարհի 29 երկրից:

Նշենք, որ Իսրայելում դատական գործ է հարուցվել անօդաչուներ արտադրող իսրայելական Aeronautics Defense Systems ընկերության դեմ, որն օգնել է Ադրբեջանին հարվածել Արցախում հայկական դիրքերի ուղղությամբ:

 Հիշեցնենք, որ 2017-ի աշնանը Ադրբեջանի ԶՈւ ներկայացուցիչները նոր իսրայելական անօդաչուների գործարկման հնարավորությունը դիտարկելիս երկիր ժամանած մասնագետներին խնդրել են ցուցադրել Orbiter 1K կամիկաձե-անօդաչուի հնարավորությունները: Այդ նպատակն իրականացնելու համար անօդաչուն կառավարող օպերատորներին առաջարկել են հարվածել երկու երկրի սահմանին գտնվող հայ զինծառայողների դիրքերի ուղղությամբ: Նշվում է, որ իսրայելցի օպերատորները հրաժարվել են, սակայն Aeronautics Defense Systems-ի ղեկավարներն իրենք են հարված հասցրել: Նպատակակետին նրանք չեն դիպել, սակայն անօդաչուներից մեկն ընկել է ՀՀ զորքերի դիրքերից 100 մետր հեռավորության վրա: