Բրազիլիայում դանակահարել են նախագահական ընտրություններում առաջատար թեկնածուին (տեսանյութ)

Բրազիլիայի Մինաս Ժերայս նահանգի Ժուիս դի Ֆորա քաղաքում նախընտրական քարոզարշավի շրջանակներում անցկացվող միջոցառման ժամանակ նահանգի բնակիչներից մեկը դանակահարել է նախագահի թեկնածու Ժաիր Բոլսոնարուին: Բոլսոնարուն բավական ծանր վիճակում հոսպիտալացվել է, սակայն այժմ քաղաքական գործչի վիճակը բավարար է գնահատվում, հաղորդում է РИА Новости-ն՝ Բոլսոնարուի որդու՝ Ֆլավիոյի հաղորդագրությանը հղումով:

«Նրան վիրավորել են որովայնի հատվածում… ցավոք, վիրավորումը շատ ավելի վտանգավոր էր, քան մենք էին սպասում… մասամբ վնասվել էին լյարդը, թոքերն ու աղիները: Նա շատ արյուն էր կորցրել և հոսպիտալացվել է գրեթե մահամերձ վիճակում, սակայն այժմ նրա վիճակը կայուն է»,- հայտնել է Ֆլավիո Բոլսոնարուն:

Այն բանից հետո, ինչ Լուիս Ինասիու Լուլա դա Սիլվային թույլ չեն տվել մասնակցել հոկտեմբերին կայանալիք նախագահական ընտրություններին, հենց Բոլսոնարուն էր համարվում ընտրություններում հաղթողի հիմնական հավակնորդը:

 Համացանցում հայտնված տեսանյութում երևում է, թե ինչպես է ամբոխը ձեռքերի վրա տանում Բոլսոնարուին, սակայն հավաքվածներից մեկն անսպասելիորեն դանակահարում է նախագահի թեկնածուին, որից հետո վերջինիս դեմքի արտահայտությունը կտրուկ փոխվում է և նա ընկնում է:

Ոստիկանությունը տեղում ձերբակալել է հանցագործին, որը նահանգի 40-ամյա բնակիչ է: Ավելի ուշ ոստիկանությունը հայտարարել է, որ տղամարդը նման քայլի է դիմել Բոլսոնարուի հետ ունեցած գաղափարական անհամաձայնությունների պատճառով: «Նա նաև հայտնել է, որ այստեղ անձնական հարց կար»,- մեջբերում է ոստիկանության ներկայացուցչի խոսքը G1 պորտալը:

Նշվում է, որ չնայած հանցագործության պատճառը գաղափարական անհամաձայնություններն են, այնուամենայնիվ ձերբակալված տղամարդը որևէ քաղաքական կուսակցության անդամ չէ: