Transperency International-ը մտահոգված է Բրիտանիայում ադրբեջանական լոբբիստների վարքագծով

Transperency International իրավապաշտպան կազմակերպության բրիտանական գրասենյակը զեկույց է հրապարակել, որում մտահոգություն է հայտնել որոշ արտասահմանյան լոբբիստների վարքագծի հետ կապված, որոնք Բրիտանիայում ներկայացնում են կոռումպացված եւ բռնատիրական ռեժիմները:

Կազմակերպությունն առանձնացրել է Ադրբեջանի, Ռուսաստանի եւ Բահրեյնի լոբբիստներին: Մասնավորապես՝ զեկույցում նշվում է, որ խորհրդարանում ադրբեջանական լոբբիի գործունեությունը դարձել է առանձնապես տխրահռչակ:

Կազմակերպությունը շեշտում է Ադրբեջանի ներգրավվածությունը ԵԽԽՎ վերջին կոռուպցիոն սկանդալին՝ հավելելով, որ Բրիտանիայի պատվիրակներից Ռոբերտ Վոլթերը խախտել է Եվրոպայի Խորհրդի վարքագծի կոդեքսը: ԵԽԽՎ մեկ այլ պատվիրակ Մայք Հենոքը, որը ռեժիմին պաշտպանել է 2008 եւ 2010 թվականների ընտրություններում, հրաժարվել է կոռուպցիայի գործով ցուցմունք տալուց՝ վկայակոչելով առողջական խնդիրները: Սակայն հայտնի է, որ Հենոքի շտաբը ադրբեջանական լոբբիստական կազմակերպությունից ավելի քան 11 հազար ֆունտ է ստացել:

Դրանից զատ, պաշտոնական փաստաթղթերի եւ նյութերի վերլուծությունը ցույց է տվել, որ 2007-2017 թվականների ժամանակահատվածում 71 խորհրդարանականներ եւ նրանց անձնակազմը 111 այց են կատարել Ադրբեջան, եւ այս բոլոր այցերի համար վճարել է նույն ադրբեջանական լոբբիստական կազմակերպություն «Եվրոպական ադրբեջանական միությունը»: Ուղեւորությունների արժեքը նվազագույնը 333 հազար ֆունտ է: Չնայած բոլոր ուղեւորությունները ներկայացվել են որպես հիմնավորված, սակայն դեպքերի մեծ մասում հասկանալի չէ, թե դրանք ինչպես են առնչվել խորհրդարանականների պարտականություններին:

Զեկույցում մանրամասն ներկայացվում են բրիտանացի խոերհրդարանականներին բոլոր վճարումները: