Խոշտանգումներն Ադրբեջանում համակարգային բնույթ են կրում

Ադրբեջանում ոստիկանության և իրավապահ այլ մարմինների կողմից խոշտանգումները համակարգային բնույթ են կրում: Այդ մասին գրում է Human Rights Watch միջազգային իրավապաշտպան կազմակերպության Հարավային Կովկասի հարցերով ղեկավար Գիորգի Գոգիան՝ վկայակոչելով Եվրոպայի խորհրդի խոշտանգումների կանխարգելման կոմիտեի զեկույցը:

Եվրոպայի խորհրդի խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի զեկույցը, որը հիմնվում է 2004-2017 թվականներին Ադրբեջան իրականացված վեց այցերից ստացված տվյալների վրա, փաստագրել է կալանավորների, այդ թվում՝ երիտասարդ կալանավորների նկատմամբ դաժան վերաբերմունքի պարբերական դեպքեր: Այդ դեպքերը եղել են իրար նման, հիմնականում տեղի են ունեցել ոստիկանական բաժանմունքներում՝ ձերբակալման նախնական ժամերի ընթացքում՝ խոստովանություն կամ այլ վկայություն կորզելու նպատակով:

 Կոմիտեն պարզել է նաև, որ խոշտանգումները հաճախ չեն բացահայտվում՝ արդյունավետ հետաքննությունների և անբավարար իրավական երաշխիքների բացակայության պատճառով: Human Rights Watch-ի հետազոտությունները նույնպես ցույց են տվել, որ Ադրբեջանում կալանավորները հաճախ չեն ստանում փաստաբան ընտրելու հնարավորություն և անգամ եթե բողոքում են վատ վերաբերմունքից, հետաքննությունները գրեթե երբեք չեն ավարտվում որևէ մեկին պատասխանատվության ենթարկելով: Վատ վերաբերմունքի մասին փաստերի հրապարակումն իր հերթին կարող է պատասխան քայլերի հանգեցնել: Ադրբեջանի ամենահայտնի բլոգերներից մեկը՝ Մեհման Հուսեյնովը, երկու տարվա ազատազրկման է դատապարտվել ոստիկաններին «զրպարտելու» համար՝ իր նկատմամբ վատ վերաբերմունքի մասին բարձրաձայնելուց հետո:

Գիորգի Գոգիան նշում է, որ չնայած կոմիտեն որոշակի դրական փոփոխություններ է գտել, ինչպես շենքերի վերանորոգումները, շատ խնդիրներ շարունակում են չլուծված մնալ, այդ թվում՝ բանտերի գերծանրաբեռնվածությունը, անբավարար բժշկական խնամքը, կոռուպցիան և կալանավայրերի անձնակազմի շրջանում «բռնության մշակույթը»:

Իրավապաշտպան կազմակերպության ներկայացուցիչը կոչ է արել Ադրբեջանի իշխանություններին խոշտանգումների նկատմամբ անհանդուրժողականության քաղաքականություն որդեգրել և երաշխավորել նման փաստերի վերաբերյալ արագ և արդյունավետ հետաքննությունների ընթացքը:

Այս թեմայով Հայաստանի և Ադրբեջանի ԱԳ նախարարների հանդիպումը կկայանա փետրվարի 28-29-ը Բեռլինում. ԱԳՆ խոսնակ ԱՄՆ-ն «ձեռքերը լվացել է» Հայաստան-Ադրբեջան բանակցային գործընթացից. Արթուր Խաչատրյան Ալիևը պաշտոնական այցով ժամանել է Թուրքիա Ադրբեջանն ու Ղազախստանը համատեղ վարժանքներ կանցկացնեն «Ռոյթերզ». «Մոսկվան լարվածություն է բորբոքել հօգուտ Ադրբեջանի»