«Շախմատի երկիր Հայաստան». Նյու Յորքցի բլոգերը պատմել է դպրոցներում շախմատ սովորեցնելու պրակտիկայի մասին (տեսանյութեր)

Նյու Յորքում բնակվող բլոգեր Նուսեիր Յասինը, որը ճամփորդում է տարբեր երկրներով ու ամեն այցելության վերաբերյալ մեկ րոպեանոց ուշագրավ տեսաանդրադարձեր հրապարակում իր ֆեյսբուքյան էջում, հերթական տեսանյութն է հրապարակել Հայաստանի մասին:

Քսանհինգամյա երիտասարդը, որը, ի դեպ, հեղինակավոր Հարվարդի համալսարանի շրջանավարտ է, իր տեսանյութում զարմանքով պատմում է հայկական դպրոցներում երեխաներին շախմատ սովորեցնելու պրակտիկայի մասին:

«Այստեղ բոլոր աշակերտները պարտադիր «Շախմատ» առարկա են անցնում՝ հատուկ դասասենյակներում: Դա նրանց սովորեցնում է՝ ինչպես կենտրոնանալ, զարգացնել ճանաչողական հմտությունները: Հայաստանն աշխարհում շախմատի առումով ամենաուժեղ երկրներից է»,-ընդգծում է բլոգերը:

Հետաքրքրական է, որ Յասինին հաջողվել է հանդիպել ՀՀ նախագահ Արմեն Սարգսյանի հետ, որն էլ տեսախցիկի առաջ խոստովանել է, որ շախմատի մեծ սիրահար է:

Բացի այդ, նա հանդիպել է շախմատի աշխարհի եռակի չեմպիոն Լևոն Արոնյանին:

Դատելով բլոգերի արձագանքից՝ երկրում երեխաներին շախմատ սովորեցնելու պրակտիկան շատ է դուր եկել նրան: Յասինն ընդգծում է, որ «դեռ մանկուց երեխաների մեջ կարգապահություն, համբերատարություն, մարտավարություն սերմանելն ու կենտրոնանալու կարողությունը զարգացնելը հնարավորություն կտա շախմատի գրոսմայստերների աշխարհ ստեղծել»: 

Նախօրեին էլ բլոգերը հայաստանյան այցի մասին «Ազատ ջրի երկիր» խորագրով տեսանյութ էր հրապարակել՝ հիացած պատմելով Երևանի տարբեր անկյունններում գտնվող ցայտաղբյուրների մասին:

«Հայերենով «պուլպուլակ» կոչվող այս աղբյուրներն, իմ կարծիքով, հանճարեղ համակարգ են, քանի որ թույլ են տալիս զգալի նվազեցնել պլաստիկի օգտագործումը (նկատի ունի խմելու ջրի համար օգտագործվող շշերը), գումար չծախսել խմելու ջուր գնելու համար ու կրճատել ջրի կորստի ծավալը»,-նշել է Յասինը:

Այս թեմայով Երկիր, որը պետք է տեսնես... Հայտնի բլոգեր Nas Daily-ի տեսանյութը՝ Հայաստանի մասին «Ինչո՞ւ են Հայաստանի տաքսիներն ավելի լավը». Նյու Յորքում բնակվող բլոգերը հերթական տեսանյութն է հրապարակել Հայաստանի մասին Վայր, որտեղ գրավիտացիան չի գործում. Nas Daily-ն հրապարակել է Հայաստանի մասին հերթական տեսանյութը «Պատերազմը չի ավարտվում, անգամ, երբ խաղաղությունն է գալիս». Nas Daily-ի նոր տեսանյութը՝ Հայաստանի մասին Հայաստանից Nas Daily-ի հերթական տեսանյութը նվիրված է հայտնի հայ անվաչմշկորդին. (Տեսանյութ)