Ամերիկահայ գործարարի ընկերության համար Բավրայի անցակետում արհեստական խոչընդոտներ են ստեղծել (տեսանյութ)

Ամերիկահայ գործարար Գագիկ Թամրազյանը Tert.am-ին է դիմել՝ բարձրաձայնելով, որ չնայած խոստացված բարեփոխումներին՝ Բավրայի անցակետում իր ընկերության համար արհեստական խոչընդոտներ են ստեղծվել բեռները ներկրելու համար:

«Մեկ շաբաթ է՝ մեր բեռը Հայաստանում է, բայց ունենք լուրջ խնդիրներ, արդեն մի քանի օր է, ինչ մեր բեռնարկղը՝ կոնտեյները, գտնվում է Բավրայի անցակետում, վրացի վարորդը սոված մեքենայի մեջ նստած է, թույլ չեն տալիս բեռն անցկացնել»,-ասաց նա:

Ըստ գործարարի՝ ԱՄՆ-ում գործող «Unity shipping group» ընկերությունը, որը պայմանագիր ունի ՀՀ-ում գործող «Trans shipping» ընկերության հետ, Լոս Անջելեսից Հայաստան սկզբնական շրջանում դրամական փոխանցումներ է իրականացրել, այնուհետև նաև իրականացնում են ծանրոցների տեղափոխում Հայաստան: Գագիկ Թամրազյանը վստահեցրեց, որ անցած տարիներին իրենց բոլոր ծանրոցներն անարգել, սահուն կերպով անցել են «Ապավեն» մաքսային տերմինալով, հիմա խնդրի առաջ են կանգնել:

 «Խնդիրն այն է, որ մենք մշտապես բեռը մաքսազերծել ենք «Ապավեն» մաքսային տերմինալում, սակայն, չգիտեմ ինչ պատճառով, պահանջում են, որ բեռը պետք է տանենք Զվարթնոցի «Կարգո» տերմինալ և այնտեղ մաքսազերծենք, որտեղ շատ ավելի բարձր գումարներ պետք է վճարեն՝ 10 անգամ թանկ է: Հասկանալի չէ, ինչու է նման որոշում կայացվել, ես էլի պատրաստ եմ վճարել, եթե այդ գումարը գնում է պետբյուջե, բայց այստեղ ինչ-որ խաղ կա, որը չեմ հասկանում, փորձում ենք պարզաբանել: Մեզ ստիպում են տանել այլ տերմինալ, օդային ճանապարհով եկող տերմինալ, որտեղ մասնավոր մեկը պետք է այդ օրերի գանձումներից հարստանա, չգիտեմ ով է տերը, ասացին՝ Էռնեկյան, բայց չեմ կարծում, որ այդ մեծահարուստ մարդը ուզենա կողոպտել իր հայրենակիցներին»,-ասաց նա:

Գագիկ Թամրազյանը նշեց, որ երբ որ իրենք զանգահարում են Բավրայի պետի տեղակալ Արտակ Խաչատրյանին, նա չի կարողանում բավարար պատասխան տալ:

«Երբ հարց ենք տալիս՝ ինչ հիմունքներով եք կանգնեցրել և թույլ չեք տալիս, նա ոչինչ չունի ասելու, միայն ասում է, որ չի կարող պատասխանել, ոչ մի փաստաթուղթ չի ներկայացնում հիմնավորման համար, միայն ասում է՝ դիմեք ՊԵԿ-ի վարչարարության պետին»,-ասաց նա և նշեց, որ այստեղ էլ ասում են, որ կառավարության որոշում է:

Մանրամասները՝ տեսանյութում: