Ըստ նախնական հարցումների՝ Էրդողանն ընտրությունների առաջին փուլում չի հաղթահարի անհրաժեշտ 50 տոկոսի շեմը

Թուրքական SONAR հետազոտական կենտրոնը հրապարակել է Թուրքիայում նախագահական ու խորհրդարանական ընտրությունների հետ կապված վերջին հարցումների արդյունքները։

Ինչպես փոխանցում է Odatv հեռուստաընկերությունը, ըստ նախնական ուսումնասիրության՝ գործող նախագահ Ռեջեփ Թայիփ Էրդողանն ընտրությունների առաջին փուլում չի կարողանա հաղթահարել անհրաժեշտ 50 տոկոս ձայների շեմը։ Հարցումները ցույց են տալիս, որ ներկայում Էրդողանի օգտին քվեարկել պատրաստ է ընտրողների 48,3 տոկոսը։

Ընդդիմադիր Ժողովրդահանրապետական կուսակցության թեկնածու Մուհարրեմ Ինջեի կողմնակիցները 31,4 տոկոս են։ Ընդ որում՝ Ինջեի ցուցանիշը վերջին շաբաթվա ընթացքում աճել է մոտ 10 տոկոսով։

Նորաստեղծ ընդդիմադիր և ազգայնական «Լավ» կուսակցության առաջնորդ Մերալ Աքշեներին պատրաստ է ձայն տալ հարցվածների 9,5 տոկոսը։

Քրդամետ Ժողովրդադեմոկրատական կուսակցության թեկնածու Սելահաթթին Դեմիրթաշի աջակիցներն, ըստ հարցման, 8,2 տոկոս են, իսկ ընդդիմադիր ու իսլամիստական գաղափարախոսությամբ աչքի ընկնող «Երջանկություն» կուսակցությունից Թեմել Քարամոլլաօղլուին աջակցում է հարցվածների ընդամենը 2,1 տոկոսը։

Ամենացածր ցուցանիշը գրանցել է ազգայնական գործիչ, «Հայրենիք» կուսակցության առաջնորդ Դողու Փերինչեքը՝ 0,5 տոկոս։

Ինչ վերաբերվում է խորհրդարանական ընտրություններին, SONAR-ի ուսումնասիրությունները փաստում են, որ իշխող «Արդարություն և զարգացում» կուսակցությունը միայնակ չի կարողանա խորհրդարանական մեծամասնություն ապահովել։

Իշխող կուսակցության ու նրա կոալիցիոն գործընկեր «Ազգային շարժում» կուսակցության կազմած դաշինքին խորհրդարանական ընտրություններում պատրաստ է ձայն տալ հարցվածների 49.3 տոկոսը։ Ընդդիմադիր Ժողովրդահանրապետական, «Լավ» և «Երջանկություն» կուսակցությունների կազմած դաշինքի կողմնակիցները կազմել են հարցվածների 39,5 տոկոսը։ Իսկ քրդամետ ժողովրդադեմոկրատներին պատրաստ է աջակցել հարցման մասնակիցների 10 տոկոսը։

Այս թեմայով Ստամբուլի քաղաքային ավտտոբուսները հետաքրքիր ձեւով են շնորհավորել նոր քաղաքապետի հաղթանակը (տեսանյութ) Ստամբուլի քաղաքապետի իշխանական թեկնածուն պարտությունից հետո արտասվել է (տեսանյութ) Թուրքիայի ԳԸՀ-ն հրաժարվել է չեղյալ համարել նախագահական ընտրությունների արդյունքները Թուրքիան կքվեարկի այնքան, մինչեւ որ Էրդողանն ստանա ցանկացածը. NYT Ստամբուլի ընդդիմադիր քաղաքապետը հրաժարվել է ընդունել ԿԸՀ որոշումը