Թուրքիայում միաժամանակյա գործողությունների արդյունքում օդուժի 91 զինվորական է ձերբակալվել

Թուրքիայի Իզմիր քաղաքի հանրապետական դատախազության որոշման համաձայն՝ այսօր լայնածավալ ոստիկանական գործողություն է սկսվել Թուրքիայի օդուժի տասնյակ զինվորականների դեմ․ վերջիններս մեղադրվում են 2016 թվականի հուլիսի 15-ի ռազմական հեղաշրջման փորձի կազմակերպիչներին աջակցելու համար։

Ինչպես փոխանցում է թուրքական «Սաբահ» պարբերականը, գործողության ընթացքում ձերբակալվել է 91 զինվորական, որոնցից 80-ը՝ ենթասպա, 1-ը՝ գնդապետ, 4-ը՝ լեյտենանտ, 5-ը՝ կապիտան, 1-ը՝ մայոր։

Հայտնի է, որ ոստիկանական ուժերը շարունակում են միաժամանակյա լայնամասշտաբ գործողությունները երկրի 15 նահանգում։

Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն:

 Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին: