Սերժ Սարգսյանին ուղղված շնորհավորանքն իմ աշխատողներն են ջնջել, որոնց ազատել եմ աշխատանքից. Գոռ Վարդանյան (Տեսանյութ)

Ես շնորհակալություն եմ հայտնել Սերժ Սարգսյանին, որովհետեւ այս երիտասարդական շարժումը բավական շատ էին եւ բավական կարեւոր որոշում ընդունեց Սերժ Սարգսյանը դրա համար ուրախացա: Այս մասին, այսօր՝ ապրիլի 27-ին, Երեւանի քաղաքապետարանում լրագրողների հետ զրույցում նշել է Երևանի քաղաքապետ Տարոն Մարգարյանի խորհրդական Գոռ Վարդանյանն՝ անդրադառնալով համացանցում հայտնված տեսանյութին, որտեղ ինքը Սերժ Սարգսյանի հրաժարականի օրը փողոցում շնորհավորում էր ժողովրդին:

Հարցին, թե այդ դեպքում՝ ինչո՞ւ է Facebook-ի իր էջից հեռացրել Սերժ Սարգսյանին ուղղված շնորհավորական գրառումը, երբ վերջինս ընտրվել էր վարչապետ, Գոռ Վարդանյանը պատասխանեց. «Իմ Facebook-յան էջերը միշտ վարել են աշխատողները, ես տեղյակ չեմ եղել, որ ջնջել են, որի պատճառով բոլորն ազատվել են աշխատանքից»:

Հարցին, թե Տարոն Մարգարյանը չի՞ բարկացել, որ իր խորհրդականը դուրս է եկել փողոց ու կիսել իր ուրախությունը Սերժ Սարգսյանի հրաժարականի առիթով, Գոռ Վարդանյանն արձագանքեց. «Ես դուրս եմ եկել փողոց եւ կիսել եմ իմ ուրախությունը: Շնորհավորել եմ իրենց, որովհետեւ մեր ժողովուրդն է, մեր երեխաներն են, մեր քույրիկներն են ու եղբայրները, մեր հասարակությունը: Ի՞նչ վատ բան կա այդտեղ: Ստեղծվել է նոր երիտասարդական մեծ շարժում եւ գովելի է, որ այսքան շատ երիտասարդ դուրս է եկել փողոց: Եվ շատ կարեւոր էր, որ Սերժ Սարգսյանը չգնաց ծայրահեղ քայլերի: Ես ժողովրդական մարդ եմ, ես շփվում եմ բոլորի հետ, ցանկացած պահի դուրս եմ գալիս փողոց, կազմակերպում եմ սպորտային միջոցառումներ, ֆիլմեր եմ նկարում, դաստիարակում եմ, ուղղություն եմ ցույց տալիս», - նշեց նա:

Դիտարկմանը, որ այդ շարժումն ուղղված էր Սերժ Սարգսյանի դեմ, նա ասաց. «Այդ մարդկանց հարցրեք, պահանջել են, ստացել են: Ես միշտ կողմ եմ եղել մարդկանց, որոնք ցանկացել են մի լավ բան անել մեր երկրի համար»:

Լուրեր Հայաստանից - NEWS.am