Կ. Կարապետյան. «Եթե ժողովրդի ընտրյալը ինքն է, ինքը կգնա ընտրությունների»

Եթե ժողովրդի ընտրյալը ինքն է, ինքը կգնա ընտրությունների: Այս մասին, այսօր՝ ապրիլի 25-ին, լրագրողների հետ հանդիպման ժամանակ նշել է վարչապետի պաշտոնակատար Կարեն Կարապետյանը՝ անդրադառնալով «Իմ քայլը» նախաձեռնության առաջնորդ Նիկոլ Փաշինյանի պնդմանը, թե մինչեւ արտահերթ ընտրությունները իշխող մեծամասնությունը ԱԺ-ում պետք է վարչապետ ընտրի ժողովրդի թեկնածուին:

«Սահմանադրությունն այսօր չի արգելում ԱԺ-ում իրենց խմբակցությունը ներկայացնի վարչապետի իր թեկնածուին եւ եթե հաղթեն, թող լինի: Բայց մենք չենք կարող սուբյեկտիվ հատվածներ ստեղծել, որ ես ժողովրդի ընտրյալն եմ, այս կամ այն հատվածի ընտրյալն եմ»:

Ճշտող հարցին, որ բացառո՞ւմ է այդպիսի հնարավորությունը, նա արձագանքեց. «Ես բացառում եմ, որովհետեւ ժողովրդի ընտրյալը այդպես չի ընտրվում, ընտրվում է ընտրությամբ: Ես չեմ բացառում, որ ժողովրդի ընտրյալը դառնա թեկնածու, դա իմ կամքը չի»:

Ինչ վերաբերում է Փաշինյանը պնդմանը, որ նախ պետք է ձեւավորվի ժամանակավոր կառավարություն, փոխվի ընտրությունների մասին օրենքը, նոր պետք է լինեն արտահերթ ընտրությունները, վարչապետի պաշտոնակատարն ասաց. «Դա սուբյեկտիվ ցանկություն է մի քաղաքական ուժի: Մենք 2017-ին ունեցել ենք ընտրություններ: մենք ուզում ենք հաջորդը անել, որ ավելի լավ լինի: Մենք վստահ չենք, որ ամեն մի հաջորդ ընտրություն իդեալական է, որովհետեւ ընտրություններն արտահայտում են մեր քաղաքական ուժերի, մեր հասարակության բոլոր հիվանդությունները: Այդ իսկ պատճառով ժողովրդի ընտրյալը մի տարբերակ ունի՝ ընտրություններ»:

Կարեն Կարապետյանը նշեց, որ բոլոր հուզող հարցերը պետք է նստել քննարկել, դրա համար էլ հարթակ են ստեղծում. «Մենք մշակել ենք սահմանադրություն, օրենքներ, այդ դաշտից չենք կարող դուրս գալ: Մենք աշխարհին վատ ազդակներ ենք ուղարկում, որ կարող ենք սուբյեկտիվ ձեւով մեկնաբանել, թե ով է ժողովրդի ընտրյալը»:

Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:

Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել: Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը:

Փաշինյանը կոչ է արել այսօր՝ ապրիլի 25-ին վերսկսել քաղաքացիական անհնազանդության ակցիաները եւ թույլ չտալ, որ ՀՀԿ-ն մնա իշխանության:

Այս թեմայով Արամ Աբրահամյան. Արագ ընտրեք Նիկոլ Փաշինյանին վարչապետ ՀՀԿ-ականների տարօրինակ հարցերը եւ հասարակության արձագանքը Նիկոլ փաշինյանի հանդիպումը ՀՀԿ խմբակցության հետ (Տեսանյութ) Սա Մայդան չէ. NTV-ի անդրադարձը հայաստանյան իրադարձություններին (Տեսանյութ) Նիկոլ Փաշինյանը ՌԴ պատվիրակության հետ քննարկել է ՀԱՊԿ-ի եւ ԵԱՏՄ-ի հարցերը