Տարեց ամերիկացին 39 տարի միևնույն նվերն է նվիրում կնոջը Սուրբ Վալենտինի օրվա առթիվ (տեսանյութ)

ԱՄՆ-ի բնակիչ Ռոն Քրամերն արդեն 39 տարի իր կնոջը նվիրում է միևնույն շոկոլադով տուփը, սակայն ոչ տնտեսելու նկատառումներից ելնելով: Հուզիչ պատմությանն անդրադարձել է News 8 WTNH հեռուստաալիքը:

Աղբյուրի հաղորդմամբ՝ Ռոն և Դոննա Քրամերները ծանոթացել են 1979 թվականին՝ Նյու Մեխիկո նահանգի Ալբուկերկե քաղաքում. տղամարդն աշխատել է որպես ապահովագրական գործակալ: Նա թակել է Դոննայի բնակարանի դուռը՝ իր ծառայություններն առաջարկելու համար:

Շուտով նրանք սկսել են հանդիպել, և հենց առաջին Սուրբ Վալենտինի օրը Ռոնը նվիրել է իր սիրելիին նրա սիրած կրեմային լցոնով շոկոլադե կոնֆետները:

Խանութում տղամարդուն ասել են, որ եթե նա պահի տուփը, հաջորդ տարի այն կրկին կլցնեն կոնֆետներով, և նա ստիպված չի լինի կրկին վճարել տուփի համար, և տղամարդը 38 տարի անընդմեջ հենց այդպես էլ արել է:

 2014 թվականին Դոննայի մոտ թուլամտություն է ախտորոշվել, իսկ 2015 թվականի օգոստոսին կնոջը տեղափոխել են ծերանոց, քանի որ նա ինքնուրույն չէր կարողանում ոչինչ անել:

«Այն օրը, երբ մեզ բաժանեցին, իմ կյանքի ամենատխուր օրն էր», - ասել է Քրամերը:

Տղամարդը գիտակցում է, որ ցանկացած օր կինը կարող է մոռանալ իրեն, ահա թե ինչու նա փորձում է հնարավորինս շատ ժամանակ անցկացնել նրա հետ և պահպանել բոլոր ընտանեկան ավանդույթները:

Դոննան գնահատում է իր ամուսնու ջանքերն ու խոստովանում, որ ինքը նույնքան ուժեղ է սիրում ամուսնուն ու «պահապան» է անվանում նրան: