Ադրբեջանցի միլիարդատերերը գնել են Մոսկվայի «Օլիմպիյսկի» մարզահամալիրը

«Կիևսկայա պլոշչադ» («Киевская площадь») ընկերությունը, որը պատկանում է ադրբեջանցի միլիարդատերեր Գոդ Նիսանովին ու Զարահ Իլիևին, ձեռք է բերել Մոսկվայի հայտնի «Օլիմպիյսկի» մարզահամալիրը, գրում է ադրբեջանական ԱՊԱ գործակալությունը:

Նիսանովն ու Իլիևն այն գնել են Մուսա Բաժաևին պատկանող «Ալյանս» ընկերությունների խմբից: Գործարքի արժեքն առայժմ չի հրապարակվում: Հայտնի է, որ «Օլիմպիյսկի»-ի նոր սեփականատերերը մտադիր են նախագծում ներդնել 300-400 մլն դոլարից ոչ պակաս գումար:

«Օլիմպիյսկի» մարզահամալիրը կառուցվել է 1980 թվականին: Մոսկվայի իշխանությունները կարծում են, որ համալիրում գտնվող մարզական օբյեկտները վաղուց հնացել են և չեն համապատասխանում մայրաքաղաքի պահանջներին ու միջազգային չափանիշներին:

Հայտնի է, որ «Օլիմպիյսկի»-ն վերակառուցման նպատակով կփակվի 2019 թվականին։