Իրանում նոր երկրաշարժի հետևանքով 50-ից ավելի մարդ է տուժել

Այս գիշեր Իրանի Քերման քաղաքից ոչ հեռու գտնվող Հեջդակ բնակավայրի մերձակայքում տեղի ունեցած երկրաշարժի հետևանքով տուժել է 55 մարդ, հայտնում է ria.ru-ն:

Մի շարք գյուղեր հոսանքազրկվել են, դադարեցվել է ջրամատակարարումը: Քերման քաղաքի դպրոցներն ու համալսարանները երեկ ու այսօր փակ են:

Հիշեցնենք, որ դեկտեմբերի 13-ին՝ ժամը 10։04-ին, տեղեկություն է ստացվել, որ սույն թվականի դեկտեմբերի 13-ին՝ տեղական ժամանակով ժամը 01:41-ին (Գրինվիչի ժամանակով` դեկտեմբերի 12-ին, ժամը 21:41-ին), ՀՀ ԱԻՆ Սեյսմիկ պաշտպանության ծառայության սեյսմոլոգիական ցանցի կողմից գրանցվել է հյուսիսային լայնության 30.770 և արևելյան երկայնության 57.280 աշխարհագրական կոորդինատներով (Իրան, Քերման քաղաքից 53 կմ հյուսիս-արևելք), օջախի 10 կմ խորությամբ, 6.1 մագնիտուդով երկրաշարժ:

Ինչպես տեղեկացնում է ՀՀ ԱԻՆ կայքը, ստորգետնյա ցնցման ուժգնությունն էպիկենտրոնում կազմել է 8 բալ:

Երեկ էլ Իրանի արևելքում գրանցվել է 5.9 մագնիտուդ ուժգնությամբ երկրաշարժ։ Նշվում է, որ երկրաշարժի օջախը գտնվել է 40 կմ խորության վրա: