Ձերբակալվել է Վրաստանի պաշտպանության եւ ՆԳ նախկին նախարարը

Վրաստանի պետական ​​անվտանգության ծառայությունը ձերբակալել է պաշտպանության նախկին նախարար Բաչո Ախալայային, հայտնում է Վրաստանի հանրային հեռուստատեսությունը։

Բաչո Ախալայայի ձերբակալությունը կապված է հոկտեմբերի 4-ի իրադարձությունների հետ։ Պետական ​​անվտանգության ծառայությունը պարզել է, որ նա է հոկտեմբերի 4-ի իրադարձությունները ղեկավարել ինտերնետային հավելվածների միջոցով։

Հոկտեմբերի 4-ին` ՏԻՄ ընտրությունների օրը, Վրաստանի ընդդիմությունն անցկացրել է հանրահավաք, որի մասնակիցները Ազատության հրապարակից շարժվել են դեպի նախագահական պալատ, ճեղքելով անցել ոստիկանական պատը եւ մտել բակ։ Ոստիկանական ուժերը ցուցարարներին ուժով դուրս են բերել այնտեղից։

Ախալայան Սահակաշվիլիի նախագահության ժամանակ բարձր պաշտոններ է զբաղեցրել Վրաստանում, եղել է պաշտպանության եւ ներքին գործերի նախարար։

2012 թվականի խորհրդարանական ընտրություններից հետո, որի արդյունքում Սահակաշվիլին հեռացավ իշխանությունից, Ախալայան կալանավորվել էր եւ մոտ 10 տարի անցկացրել բանտում։