Կիևին ոչ ոք չի կարող ստիպել հրաժարվել ազգային շահերից

Ուկրաինայի նախագահ Վլադիմիր Զելենսկին փակ հանդիպման ընթացքում հայտարարել է, որ խաղաղ բանակցությունների շրջանակում «Կիևին ճզմել» կամ ստիպել հրաժարվել ազգային շահերից չի հաջողվի։ «Общественное»-ի փոխանցմամբ՝ նախագահը վստահեցրել է իշխող «Ժողովրդի ծառա» կուսակցության պատգամավորներին, որ նման ենթադրությունների համար որևէ հիմք չկա, այդ հարցը բարձրացնելով ԱՄՆ-ի փոխանցած խաղաղ պլանի քննարկման ընթացքում։

Զելենսկին ընդգծել է, որ առաջիկա շաբաթը լինելու է բարդ, քանի որ սպասվում են ծանր բանակցություններ խաղաղ համաձայնագրի շուրջ։ Նա նշել է, որ Ուաշինգտոնից պաշտոնապես ստացել է հակամարտության կարգավորման առաջարկությունը նոյեմբերի 20-ին և մտադիր է այն քննարկել ԱՄՆ նախագահ Դոնալդ Թրամփի հետ։

Արևմտյան լրատվամիջոցների՝ մասնավորապես Axios-ի տվյալներով, ԱՄՆ-ի խաղաղ առաջարկը բաղկացած է 28 կետից, որոնց թվում են Ուկրաինայի Զինված ուժերի դուրսբերումը Դոնեցկի և Լուգանսկի տարածքներից, ինչպես նաև Կրիմն ու Դոնբասը Ռուսաստանի մաս ճանաչելու դրույթները։