Ադրբեջանի պահանջով միջազգային հետախուզման մեջ գտնվող 4 թուրք մտավորականների նկատմամբ հետաքննություն է սկսվել նաև Թուրքիայում

Արցախ այցելելու համար Ադրբեջանի պահանջով միջազգային հետախուզման մեջ գտնվող թուրք մտավորականների նկատմամբ հետաքննություն է սկսվել նաև Թուրքիայում: Այս մասին հայտարարել է Թուրքիայի արտաքին գործերի նախարար Մևլութ Չավուշօղլուն, գրում է թուրքական diken.com.tr կայքը:

Չավուշօղլուն հայտնել է, որ իրավական գործընթացներն արդեն մեկնարկել են, ու մտավորականները կանչվել են դատարան՝ վկայություն տալու:

Թուրքիայի արտգործնախարարը պնդել է, որ չորս մտավորականները հարցի առնչությամբ զանգահարել են իրեն ու նշել, որ տեղյակ չեն եղել, թե իրենց արածը հանցանք է:

«Ես ասացի, որ այդ նույն բանն իրենք պետք է ասեն Ադրբեջանի իշխանություններին: Ի վերջո, առաջին դասարանի երեխաներ չեն: Նրանք նամակ են հղել՝ նշելով, որ սխալվել են ու տեղյակ չէին, որ այդ քայլն անօրինական է: Բայց սա թող դաս լինի նրանց համար: Գործընթացը մեկնարկել է», - ասել է Չավուշօղլուն՝ շեշտելով, որ Թուրքիան Ադրբեջանի պես երբևէ չի ընդունի որևէ մեկի՝ առանց Ադրբեջանի թույլտվության Արցախի տարածք մուտք գործելը:

Հիշեցնենք, որ սեպտեմբերի 22-ին Հայաստանի տարածքով Արցախ այցելած թուրք մտավորականները մեղադրվում են «Ադրբեջանի պետական սահմանն ապօրինի հատելու համար»: Նրանց հանդեպ հայտարարվել է միջազգային հետախուզում: Ադրբեջանի խորհրդարանի պատգամավոր Այդըն Հուսեյնովը մեղադրել է Արցախ այցելած Թուրքիայի քաղաքացիներին դավաճանության համար ու հայտնել, որ ըստ իրեն՝ Թուրքիան կարճ ժամանակահատվածում կարտահանձնի նրանց Բաքվին:

Չորս մտավորականներից Ալի Բայրամօղլուն ավելի վաղ Ստամբուլի հայկական պարբերականներից «Ակօսին» տված հարցազրույցում նշել էր, որ իրեն հատկապես զայրացրել է այն փաստը, որ Ադրբեջանի գլխավոր դատախազը շեշտել է, թե այս մտավորականներն ունեն հայամետ դիրքորոշում և շահարկելով նրանց՝ Հայոց ցեղասպանության հարցում ունեցած դիրքորոշումը, կարծես փորձել է Թուրքիայի ներքաղաքական վիճակն օգտագործելով՝ նրանց վրա բարդել նաև Արցախի հետ կապված այս մեղադրանքը:

«Ակօսի» խնդրանքով թեմայի վերաբերյալ մեկնաբանություն էր տվել նաև փաստաբան, իրավական փորձագետ, Ստամբուլի փաստաբանների բյուրոյի նախկին նախագահ Յուջել Սայմանը:

«Այն, որ այս քաղաքացիների վերաբերյալ Բաքվում ձերբակալման ու կալանավորման որոշում կա, չի կարող նրանց արտահանձնման հիմք հանդիսանալ: Եթե նրանց արարքը հանցանք է նաև ըստ Թուրքիայի օրենքների՝ նրանք այստեղ կկրեն իրենց պատիժը: Ինտերպոլով որոնվելը նույնպես այստեղ նրանց ձերբակալելու ու արտահանձնելու հիմք չի տալիս, բայց դա կարող է տեղի ունենալ որևէ այլ՝ երրորդ երկրում», - մանրամասնել էր Սայմանը: