Թուրքիայի ԱԳՆ-ն դատապարտել է Իսրայելի ավիահարվածն Իրանին

«Մենք ամենավճռական ձևով դատապարտում ենք Իսրայելի ավիահարվածն Իրանին։ Ակնհայտ խախտելով միջազգային իրավունքը՝ այս հարձակումը սադրանք է, որը ծառայում է տարածաշրջանում իրավիճակի ապակայունացմանն ուղղված Իսրայելի ռազմավարական քաղաքականությանը», - ասվում է Թուրքիայի ԱԳՆ հայտարարության մեջ։

«Այն փաստը, որ հարվածները հասցվել են այն ժամանակ, երբ Իրանի միջուկային ծրագրի շուրջ բանակցություններն ակտիվանում են, ցույց է տալիս, որ Նեթանյահուի կառավարությունը չի ցանկանում, որ որևէ հարց լուծվի դիվանագիտական ճանապարհով։ Այն առանց վարանելու վտանգի տակ է դնում տարածաշրջանային կայունությունն ու գլոբալ խաղաղությունը հանուն իր շահերի։ Իսրայելը պետք է անհապաղ դադարեցնի իր ագրեսիվ գործողությունները, որոնք կարող են հանգեցնել նոր հակամարտությունների: Մենք կրկին հայտարարում ենք, որ չենք ցանկանում Մերձավոր Աևելքում այլևս արյունահեղություն և ավերածություններ տեսնել։ Կոչ ենք անում միջազգային հանրությանը անհապաղ միջոցներ ձեռնարկել՝ կանխելու պատերազմի տարածումը», - ասված է հայտարարության մեջ: