ԵՄ-ն Իտալիային 40 մլն եվրո է հատկացրել միգրացիոն ճգնաժամի դեմ պայքարի համար

Եվրամիությունը Իտալիային լրացուցիչ 40 մլն եվրոյի օգնություն է հատկացրել միգրացիոն ճգնաժամի դեմ պայքարի համար: Այս մասին ուրբաթ հայտնել է Եվրահանձնաժողովի մամուլի ծառայությունը, փոխանցում է ՏԱՍՍ-ը:

«Այսօր Եվրահանձնաժողովը Իտալիային գրեթե 40 մլն եվրոյի արտահերթ օգնություն է հատկացրել, որպեսզի երկիրն ավելի լավ հաղթահարի Միջերկրական ծովով ժամանող միգրացիոն հոսքերը»,- նշված է հայտարարության մեջ:

Նոր միջոցները կծախսվեն ճգնաժամի դեմ պայքարի 11 ծրագրերի զարգացման համար: Մասնավորապես՝ պետք է նպաստեն միգրանտների եւ ապաստան հայցողների պայմանների բարելավմանը, ներառյալ բժշկական օգնությունն ու թարգմանիչների ծառայությունները:

Իտալիայի ՆԳՆ տվյալներով՝ տարեսկզբից ծովով Իտալիա է ժամանել 114 հազար միգրանտից մի փոքր ավելի, ինչը գրեթե 32 տոկոսով ավելի քիչ է, քան 2016 թվականի տարվա սկզբից մինչեւ նոյեմբեր ժամանակահատվածում:

news.am