Թուրքիայում ընդդիմադիր «Զաման» պարբերականի կին լրագրողը դատապարտվել է 7.5 տարվա ազատազրկման

Թուրքիայում ընդդիմադիր «Զաման» պարբերականի լրագրող Այշենուր Փարըլդաքը դատապարտվել է յոթուկես տարվա ազատազրկման, այս մասին հաղորդում է «Անադոլու» գործակալությունը:

Նշենք, որ «Զաման» պարբերականի խմբագրության շենքն ու ամբողջ գույքը պետականացվել են դեռևս անցյալ տարվա մարտին, իսկ ռազմական հեղաշրջման փորձից հետո պարբերականի գործունեությունն ընդհանրապես դադարեցվել էր:

Փարըլդաքը Անկարայի թիվ 14 ծանր հանցագործությունների դատարանի կողմից մեղադրվել է 2016թ.-ի հուլիսի 15-ի հեղաշրջման փորձի կազմակերպիչը համարվող Ֆեթուլլահ Գյուլենի «Հիզմեթ» խմբավորման անդամ լինելու համար:

Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն:

Կին լրագրողը, սակայն, դատարանում չի ընդունել իր մեղքն ու հայտնել է, որ իր միակ մեղքը «Զաման» պարբերականի աշխատակից լինելն էր:

«Միակ մեղքս «Զաման»-ում աշխատելն էր: Երանի չաշխատեի: Թերթի առաջատար դեմքերը բոլորն այժմ դուրս են եկել երկրից, մամուլի ազատության մասին սոցցանցերում հրապարակումներ են անում: Ես պահանջում եմ ազատ արձակել ինձ», - ասել է Փարըլդաքը դատարանի դահլիճում: