Վրացական երկու բանկեր 5 մլն լարի փոխհատուցում են հատկացրել եվրոպամետ ցույցերի տուժած մասնակիցներին

«Հաշվի առնելով երկրում տիրող իրավիճակը՝ TBC-ն և Bank of Georgia-ն համատեղ կհատկացնեն 5 մլն լարի, որը կուղղվի տուժած քաղաքացիներին, ինչպես նաև փոքր ու միջին բիզնեսին աջակցելու համար»,- ասվում է բանկերի համատեղ հայտարարության մեջ։ 

Հաղորդագրության համաձայն՝ գումարի կեսն ուղղվելու է բանկային գործընկերների հետ համագործակցությամբ իրականացվող նախաձեռնություններին։ Դրանք Mymarket.ge, Glovo, tkt.ge, Extra.ge, Biletebi.ge, Wolt ընկերություններն են։ Biletebi-ն սկսել է չեղարկված ներկայացումների տոմսերի վաճառքը՝ ի աջակցություն գործադուլ անող թատրոնների։

Մյուս կեսը փոխանցվելու է հիմնադրամներին, որոնք իրավական, ֆինանսական կամ բժշկական աջակցություն են ցուցաբերել բողոքի ակցիաների ժամանակ տուժած քաղաքացիներին։

TBC Bank-ը և Bank of Georgia-ն ցուցակված են Լոնդոնի ֆոնդային բորսայում (LSE): Երկու բանկերն էլ հրապարակայնորեն դեմ են արտահայտվել «Վրացական երազանքի»՝ Եվրամիությանը երկրի անդամակցության շուրջ բանակցությունները սառեցնելու որոշմանը: