ԱՄՆ-ն Վրաստանին հրավիրել է մասնակցելու ՆԱՏՕ-ի գագաթնաժողովին

Ամերիկայի Միացյալ Նահանգները Վրաստանին հրավիրել է մասնակցելու ՆԱՏՕ-ի գագաթնաժողովին, որը կանցկացվի հուլիսի 9-11-ը Վաշինգտոնում։

Ինչպես փոխանցում է ՏԱՍՍ-ը, այս մասին արտասահմանյան լրագրողների համար ճեպազրույցում հայտարարել է ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ'Բրայենը։

Միևնույն ժամանակ՝ նա հավելել է, որ ԱՄՆ իշխանությունները շատ անհանգստացած են «Վրացական երազանք-Ժողովրդավարական Վրաստան» իշխող կուսակցության փոքր թվով առաջնորդների որոշումներով և հռետորաբանությամբ։

Օ'Բրայենի պնդմամբ՝ Վրաստանի իշխանությունների գործողությունները անհամատեղելի են ԵՄ-ին և ՆԱՏՕ-ին միանալու Թբիլիսիի ձգտումներին:

Մայիսի 14-ին Վրաստանի խորհրդարանը երրորդ ընթերցմամբ ընդունել է «օտարերկրյա գործակալների» մասին օրենքը, ինչը հարուցել է Եվրամիության և ԱՄՆ-ի կոշտ հայտարարությունները։

ԱՄՆ պետքարտուղար Էնթոնի Բլինկենը հայտարարել է, որ Միացյալ Նահանգների վարչակազմը սկսում է Վաշինգտոնի և Թբիլիսիի համագործակցության համապարփակ վերանայումը՝ կապված Վրաստանում ընդունված օտարերկրյա գործակալների մասին օրենքի հետ։

Պետդեպարտամենտը հայտարարել է Վրաստանի տասնյակ քաղաքացիների, այդ թվում՝ կառավարության անդամների, խորհրդարանի և նրանց հարազատների, ինչպես նաև իրավապահների նկատմամբ վիզային պատժամիջոցներ սահմանելու մասին՝ կապված ընդունված օրենքի հետ։