Ադրբեջանում սկսվել է նախագահի թեկնածուների նախընտրական քարոզարշավը

Ադրբեջանում մեկնարկել է նախագահի թեկնածուների նախընտրական քարոզարշավը:

«Հանրապետության ընտրական օրենսդրության համաձայն՝ նախընտրական քարոզչությունը սկսվում է քվեարկության օրվանից 23 օր առաջ, որը նշանակված է փետրվարի 7-ին, այսինքն՝ հունվարի 15-ին, և ավարտվում է ընտրություններից մեկ օր առաջ»,- հայտնել են Ադրբեջանի ԿԸՀ-ից:

Կենտրոնական ընտրական հանձնաժողովը գրանցել է երկրի ղեկավարի պաշտոնի համար յոթ թեկնածուի։ Նրանց թվում է գործող նախագահ Իլհամ Ալիևը, ում թեկնածությունն առաջադրել է իշխող «Նոր Ադրբեջան» կուսակցությունը։ Բացի այդ, հանրապետության Միլլի Մեջլիսի (խորհրդարանի) պատգամավորներ Զահիդ Օրուջը (ինքնառաջադրված), Ռազի Նուրուլլաևը (Ազգային ճակատ կուսակցության առաջնորդ), Գուդրաթ Հասանգուլիևը (Ադրբեջանի միացյալ ժողովրդական ճակատ կուսակցության նախագահ), Ֆազիլ Մուստաֆան ( գրանցվել է «Մեծ արարում» կուսակցության նախագահ), ինչպես նաև Մեծ Ադրբեջան կուսակցության առաջնորդ Էլշադ Մուսաևը և ինքնառաջադրված Ֆուադ Ալիևը։

Յուրաքանչյուր թեկնածուի Հանրային հեռուստաընկերության եթերում երեք ժամ ազատ ժամանակ է տրվում՝ իր ծրագիրը ներկայացնելու համար։

Ինչպես պարզաբանել են ԿԸՀ-ից, քարոզարշավը ընթանալու է կլոր սեղան-բանավեճերի ձևաչափով՝ բոլոր թեկնածուների մասնակցությամբ։ Նրանց ելույթների հերթականությունը կորոշվի վիճակահանությամբ։ Առայժմ հայտնի չէ՝ Ալիևն անձամբ կմասնակցի բանավեճին, թե դա, ինչպես 2013 և 2018 թվականների ընտրություններում, կվստահի իր լիազոր ներկայացուցչին։