Ես տեսա մեծ հայրենասիրություն և հայրենիքի հանդեպ մեծ մտահոգություն. Կապանի համայնքապետ

Սպահան քաղաքի համայնքապետ Ալի Ղասեմզադեի հրավերով հոկտեմբերի 20-24-ը Կապանի համայնքապետ Գևորգ Փարսյանի գլխավորած պատվիրակությունը քառօրյա պաշտոնական այցով հյուրընկալվել է Իրանի Իսլամական Հանրապետության Սպահան քաղաք։ «Հրապարակի» հետ զրույցում Կապանի համայնքապետ Գևորգ Փարսյանն ասաց, որ սեպտեմբերի 20-ին` երբ Ադրբեջանը սկսեց պատերազմն Արցախի դեմ, Կապանում ընթանում էր իրանական կողմի նախաձեռնած գիտաժողովը՝ հայ և իրանցի գիտնականների, դասախոսների մասնակցությամբ։ 

«Այն հանգամանքը, որ Իրանն անցած տարի գլխավոր հյուպատոսարան է բացել Կապան համայնքում արդեն շատ բանի մասին է խոսում։ Բավականին մեծ հետաքրքրություն ունեն տարածաշրջանի նկատմամբ՝ հատկապես Սյունիքի նկատմամբ։ Սեպտեմբերի 20-ին նախօրոք պլանավորված, իրանական կողմի նախաձեռնությամբ գիտաժողով տեղի ունեցավ, թեման վերաբերում էր Սյունիքի մարզին՝ պատմական և ռազմավարական նշանակությանը։ Գիտաժողովին մասնակցում էր պրոֆեսորա- դասախոսական լայն կազմ` տարբեր համալսարաններից և բավականին լուրջ զեկույցներով հանդես եկան»,-ներկայացրեց Փարսյանը։ 

Իսկ Սպահան այցելելու հրավերը ստացել էր դեռևս գարնանը, երբ Կապան էր այցելել Սպահանի 5-րդ շրջանի համայնքապետը: Նա էլ Կապանի համայնքապետին էր փոխանցել Սպահան քաղաքի գլխավոր համայնքապետ Ալի Ղասեմզադեի հրավերը։ 

«Ես նախատեսեցի այցը աշնանն իրականացնել՝ հոկտեմբեր ամսին, որն էլ իրականացրեցինք Կապանի պատվիրակությունով։ Մենք նախանշել ենք ոլորտները, որոնց շուրջ կարող ենք համագործակցել՝ մշակույթի, սպորտի, տնտեսության ոլորտ, առողջապահություն, տուրիզմ և բոլոր այն ոլորտները, որոնք կարող են երկուստեք հետաքրքրություն ներկայացնել»,-ասաց Կապանի համայնքապետը։ 

Վերջինս գոհ է եւ ընդունելությունից եւ հանդիպումներից, այդ թվում` հայ համայնքի տարբեր կազմակերպությունների հետ։ Հանդիպումները կայացել են ինչպես Սպահանում, այնպես էլ Թեհրանում։ 

«Իրականում շատ մտահոգ էր Իրանի հայ համայնքը մեր հայրենիքով, Արցախով, Արցախի մեր հայրենակիցներով։ Բավականին մտահոգված են նաև Սյունիքի մարզի ապագայով։ Այդ հարցերի շուրջ քննարկումներ ու մտքերի փոխանակում ունեցանք։ Ես տեսա մեր հայ համայնքի անդամների մոտ ձևավորված հայրենասիրություն հայրենիքի հանդեպ ու մեծ մտահոգություն»,-ասաց Փարսյանը։ 

Կապանի համայնքապետը Իրանում հանդիպումներ է ունեցել նաև ՍՀԹ Ազգային Առաջնորդարանում` թեմի առաջնորդ Գերաշնորհ Տ. Սիփան եպիսկոպոս Քեչեճյանի նախագահությամբ, Թեմի պատգամավորական ժողովի, Թեմական և կրոնական խորհուրդների, Հաշվեքննիչ մարմնի, Հայ Դատի հանձնախմբի անդամների ու համայնքում գործող միությունների նախագահների հետ։ 

Քննարկված թեմաների առանցքում եղել է Սյունիքը, Արցախում պատերազմի արդյունքում ստեղծված իրավիճակը: Կապանի համայնքապետը եղել է նաև Սպահանի պետական համալսարանում, հանդիպել է Հայագիտական ամբիոնի ակադեմիական կազմի հետ, այնուհետև այցելել Հայոց ազգային կրթահամալիր, որտեղ հանդիպել են «Արմէն» տարրական և «Քանանեան-Կատարինեան» միջնակարգ դպրոցների տնօրինությունների հետ, նաև Քաշանի համայնքապետի ու համայնքապետի հետ, ում կողմից ստացել է փոխգործակցության առաջարկներ։ Այցը եզրափակվել է մայրաքաղաք Թեհրանում, «Արարատ» մարզամշակութային միությունում` հայ համայնքի ներկայացուցիչների հետ հանդիպումով։