Բաքուն իր դերում. «Հայերին արտաքսելու խոսակցությունները խաթարում են խաղաղության համաձայնագրի կնքման հավանականությունը»

Սկսելով գիտակցել օկուպացված Լեռնային Ղարաբաղից ողջ հայ բնակչության արտագաղթի բոլոր բացասական հետևանքները՝ Բաքուն սկսեց մտածել, թե ինչպես հակազդել դրան և ինչպես ստիպել Երևանին լռել։

Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը թուրքական gdh.digital պարբերականին հայտնել է, որ հայ բնակիչների հեռանալն իրենց որոշումն է։ Նրանք կարող են վերադառնալ, «մեծահոգաբար» առաջարկել է Էլչին Ամիրբեկովը։

«Մենք խրախուսեցինք նրանց մնալ և դառնալ բազմազգ Ադրբեջանի մաս: Տեսեք, թե ինչ են արել Ադրբեջանի պաշտոնյաները վերջին մի քանի օրերին՝ մենք տարբեր մարդասիրական օգնություն ենք տրամադրել, դեղորայք, հրշեջ մեքենաներ։ Մենք ապահովել ենք շուրջօրյա էլեկտրամատակարարում»,- վստահեցրել է Ամիրբեկովը։

Ադրբեջանի նախագահի ներկայացուցիչը լռել է այն մասին, որ «օգնության» ուղարկմանը նախորդել է բազմամսյա շրջափակում, իսկ դատարկ Լեռնային Ղարաբաղ «օգնություն ուղարկելը» համընկնում է ՄԱԿ-ի առաքելություն այցի հետ, որով բառիս բուն իմաստով ուզում են թոզ փչել այն կառույցի պաշտոնյաների աչքերին, որը մատը մատին չի տվել Լեռնային Ղարաբաղի հայերին փրկելու համար:

«Ադրբեջանը դատապարտում է Հայաստանի վարչապետ Նիկոլ Փաշինյանի անհիմն պնդումները Ղարաբաղում «էթնիկ զտումներ» իրականացնելու վերաբերյալ։ Փաշինյանը ոչ միայն հակասում է սեպտեմբերի 21-ի իր հայտարարություններին, թե Ադրբեջանը վտանգ չի ներկայացնում տեղի հայերի համար, այն նաև փորձում է խափանել հայերին մարդասիրական օգնություն տրամադրելու Ադրբեջանի ջանքերը և նրանց վերաինտեգրման գործընթացը: Սա նաև խաթարում է Ադրբեջանի և Հայաստանի միջև խաղաղ համաձայնագրի կնքման հավանականությունը»,- ասել է Ամիրբեկովը։

Այդպիսով, Բաքուն փորձում է շանտաժի ենթարկել Երևանին՝ պահանջելով լռել խնդրի մասին։