Կարո Փայլանը կոչ է արել Թուրքիայի իշխանություններին ազատ արձակել հայտնի թուրք գործարար ու գործիչ Օսման Քավալային

Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը կոչ է արել իշխանություններին ազատ արձակել օրեր առաջ Ստամբուլում ձերբակալված թուրք գործարար, վերլուծաբան և հասարակական գործիչ Օսման Քավալային, այս մասին տեղեկանում ենք Փայլանի Twitter-յան էջից:

«Օսման Քավալան իր ամբողջ կյանքում ջանք թափեց, որպեսզի այս երկիրն ապրելու երկիր դառնա: Ազա՛տ արձակեք նրան», - գրել է հայազգի պատգամավորը:

Նշենք, որ Քավալայի հիմնած թուրքական ամենահայտնի հրատարակչություններից «Իլեթիշիմ»-ը բազմիցս անդրադարձել է նաև Հայոց ցեղասպանությանը:

Նախօրեին Թուրքիայի նախագահ Ռեջեփ Թայիփ Էրդողանը մեկնաբանել է Քավալայի ձերբակալոթյունը և մեղադրել հայտնի բարերարին դավաճանության համար: Ինչպես գրում է թուրքական t24.com.tr կայքը, Էրդողանը պնդել է, որ Թաքսիմի ցույցերի կազմակերպման հետևում Քավալան է կանգնած:

«Այս ժողովրդին ներսից հարվածողների դեմ մենք գլուխներս բարձր ենք կանգնելու, պատասխան ենք պահանջելու», - հայտարարել է Էրդողանը:

Հիշեցնենք, որ Քավալան նաև հիմնադրել ու ղեկավարում է թուրքական հայտնի «Անադոլու քյուլթուր» հիմնադրամը, որը զբաղվում է մշակութային փոխանակության ու մշակութային ժառանգության ուսումնասիրության լայնածավալ ծրագրերով Թուրքիայում, տարածաշրջանում և Եվրոպայում:

Ծնունդով Փարիզից թուրք գործիչը հովանավորել է նաև Դիարբեքիրի մշակութային տան, Պատմության հիմնադրամի ծրագրերն ու Հելսինկյան քաղաքացիական ասամբլեայի անդամ է: