Իրանի ԱԳՆ-ն քննադատել է G7-ի ղեկավարների հայտարարությունում երկրի հասցեին նշված մեղադրանքները

Իրանի ԱԳՆ-ի պաշտոնական ներկայացուցիչ Նասեր Քանանի Չաֆին քննադատել է G7-ի առաջնորդների վերջնական հայտարարությունը, որը, նրա խոսքով, անհիմն մեղադրանքներ է պարունակում իսլամական հանրապետության հասցեին։ Այս մասին ասված է երկուշաբթի Իրանի ԱԳՆ-ի Telegram ալիքում հրապարակված հաղորդագրության մեջ։

«Մենք բազմիցս ընդգծել ենք, որ Իրանի միջուկային ծրագիրը հետապնդում է բացառապես խաղաղ նպատակներ, իսկ միջուկային զենքը տեղ չունի մեր ռազմական դոկտրինում»,- ասել է Քանանին։ «Իրանը միշտ հետեւել է իր միջազգային պարտավորություններին եւ վճռական է շարունակելու իր կառուցողական համագործակցությունը Ատոմային էներգիայի միջազգային գործակալության (ԱԷՄԳ) հետ»,- հավելել է նա։

Իրանի ԱԳՆ ներկայացուցիչը նաեւ նշել է, որ, Արեւմուտքի պնդումներին հակառակ, Իրանը «երբեք Ռուսաստանին անօդաչու սարքեր չի տրամադրել» եւ շարունակում է հանդես գալ ուկրաինական ճգնաժամի խաղաղ լուծման օգտին։ Բացի այդ, նա հիշեցրել է, որ իրանական կողմը միշտ ջանքեր է գործադրել Մերձավոր Արեւելքում նավագնացության անվտանգության ապահովման համար։

G7-ի առաջնորդները, շաբաթ օրը Հիրոսիմայի գագաթաժողովի ավարտից մեկ օր առաջ հրապարակված համատեղ հայտարարության մեջ ընդգծել են իրենց նպատակը՝ թույլ չտալ Իրանին միջուկային զենք ստեղծել եւ մտահոգություն հայտնել իրանական միջուկային ծրագրի վերաբերյալ, որը, նրանց կարծիքով, «համոզիչ քաղաքացիական հիմնավորում չունի»։ Բացի այդ, G7-ի առաջնորդները կոչ են արել Իրանին հրաժարվել ուկրաինական ճգնաժամի համատեքստում Ռուսաստանին տրամադրվող աջակցությունից եւ դադարեցնել Մերձավոր Արեւելքում նավագնացության համար սպառնալիքի ստեղծումը: