Ադրբեջանցի գործարարը փողերի լվացման սխեմայով Մեծ Բրիտանիա է «տարել» 15 մլն ֆունտ սթեռլինգ
Բրիտանական BBC հեռարձակող կորպորացիան եւ Evening Standard թերթը շահել են դատավարությունն ընդդեմ «ադրբեջանցի շատ հաջողակ, միջազգային մակարդակի խոշոր գործարարի», որը մեղադրվում է փողերի լվացման մեջ։
Ինչպես տեղեկացրել է haqqin.az-ը, գործարարի անունը հիշատակվում է դատական գործում՝ կապված 2017թ. իրականացված «Ադրբեջանական լվացքատան» հետաքննության հետ։ Դատարանը վճռել է, որ այդ մարդու անունը չպետք է հրապարակվի, սակայն BBC-ն եւ Evening Standard-ը չեն հաշտվել եւ հայց են ներկայացրել Լոնդոնի Բարձրագույն դատարան։ Բարձրագույն դատարանը հայցը բավարարել է եւ որոշել, որ գործարարի անունը պետք է հրապարակվի Մեծ Բրիտանիայի հանցավորության դեմ պայքարի ազգային գործակալության կողմից։ Սակայն դատավճիռն անմիջապես չի իրականացվի, քանի որ գործարարը բողոքարկելու իրավունք ունի։
Միեւնույն ժամանակ, տեղեկացվել է, որ վերոնշյալ գործարարը կապված է Ադրբեջանի խորհրդարանի պատգամավոր Ջավանշիր Ֆեյզիեւի հետ։ Վերջինը, հիշեցնենք, մեղավոր է ճանաչվել Լոնդոնում փողերի լվացման մեջ եւ համաձայնել է վճարել 5,7 մլն ֆունտ սթեռլինգ հայցը հետ կանչելու համար, որը ներկայացրել է հանցավորության դեմ պայքարի ազգային գործակալությունը։ 2022թ. հունվարին Լոնդոնի դատարանը դատավճիռ է կայացրել Ֆեյզիեւի կնոջ՝ Փարվանայի, նրա որդու՝ Օրհանի եւ ազգականի՝ Էլման Ջավանշիրի հանդեպ։ Դատավճռի համաձայն՝ Մեծ Բրիտանիայում այդ մարդկանց բանկային հաշիվների վրա Ադրբեջանից փողերի լվացման սխեմայով փոխանցվել է 15 մլն ֆունտ սթեռլինգ։ Դրանցից 5,7 մլն-ն առգրավվել է։ Մնացած գումարը վերադարձրել են տերերին։
Ադրբեջանցի խոշոր գործարարը, որի անունը շրջանառվում է նոր դատական հետաքննությունում, չի մտնում Ֆեյզիեւի գործով մեղադրվողների մեջ, բայց որոշակի կապեր ունի այդ ընտանիքի հետ։ Ադրբեջանցի գործարարն ինքը հավաստիացրել է, որ եթե իր անձը բացահայտվի, «նրա իմիջին եւ գործնական հեղինակությանը հսկայական եւ կործանիչ հարված կհասցվի»։ Դատարանում նրան պաշտպանում են լորդ Փանիկը եւ երկու ամենաթանկ փաստաբանները Մեծ Բրիտանիայում։ Նրանց մեջ է Փաստաբանների կոլեգիայի նախկին նախագահ Դեսմոնդ Բրաունը։ Ջուդ Բանթինգը, որը ներկայացնում է ВВС-ն, Բարձրագույն դատարանում անցած տարվա լսումների ժամանակ հայտարարել է, որ ռեպորտաժների ցանկացած սահմանափակում պետք է «խիստ անհրաժեշտ լինի եւ արդարացվի հստակ ու համոզիչ ապացույցներով»։
«Այս գործն անդրադառնում է այնպիսի թեմայի, որը մեծ հանրային հետաքրքրություն է ներկայացնում։ Դատաքննությունը՝ հիմնված լրագրողական հետաքննությունների եւ դատաքննությունների տեղեկությունների վրա, կարեւոր ավանդ կներդնի նյութի հանրային ընկալման հարցում»,- ասել է նա։ Գործարարն ինքը հավաստիացրել է, որ ընդամենը «երկրորդական» դեմք էր քննվող գործում։ Սակայն ավելի ուշ դատավորը նրան «կարեւոր անձ» է համարել։ Մարտի վերջի լսումների ժամանակ դատավոր լորդ Ուորբին հայտարարել է, որ որեւէ ծանրակշիռ պատճառ չկա, ինչի համար գործարարի անունը չպետք է հրապարակվի։ «Սա այն դեպքը չէ, երբ ապացույցները բացում են ինտիմ անձնական տեղեկություն, որը պատասխանողը կարող էր հիմնավորված ձեւով թաքցնել զանգվածային լրատվամիջոցներից։ Ես չեմ հասկանում, թե ինչու մամուլի ներկայացուցիչները չեն կարողացել ներկա լինել լսումներին, եւ նրանց թույլ են տվել բանավոր հայտարարություններ անել միայն այն բանից հետո, երբ այդ լսումներն ավարտվել են»,- իր հերթին նշել է դատավոր Մոստինը։