Վրաստանի վարչապետը Մյունխենի համաժողովում խոսել է Սաակաշվիլիի «դերասանական տաղանդների» մասին

Մյունխենի անվտանգության համաժողովում Վրաստանի վարչապետ Իրակլի Ղարիբաշվիլին ստիպված է եղել պատասխանել կալանքի տակ գտնվող Վրաստանի երրորդ նախագահ Միխեիլ Սաակաշվիլիի վիճակի մասին հարցին, գրում է «Новости-Грузия»-ն։

«Դուք նշեցիք կադրեր, լուսանկարներ, ես կասեմ, որ պարոն Սահակաշվիլին լավ դերասան է», - ասել է Ղարիբաշվիլին՝ նախկին նախագահին անվանելով հանցագործ եւ հերքելով, նրա ծայրահեղ ծանր վիճակում գտնվելը։

Նրա խոսքով՝ Սաակաշվիլին արդեն ութ ամիս է, ինչ պատիժը կրում է մասնավոր բժշկական կլինիկայում, որտեղ նրան տեղափոխել են բանտից, եւ նրան տրամադրվում են առավելագույն հարմարավետություն եւ արտոնություններ, որոնք չունեն մյուս բանտարկյալները։

«Դուք հավանաբար ապատեղեկատվություն եք տեսել, որոնք տարածվում են Սաակաշվիլիի ընտանիքի կողմից վարձված լոբբիստական ​​ընկերությունների միջոցով… Այն, ինչ տեսնում եք տեսանյութում, Facebook-ում, սոցիալական ցանցերում, ճիշտ չէ», - ասել է Ղարիբաշվիլին:

Վրաստանի վարչապետը նշել է նաեւ, որ «Վրաստանն ունի ուժեղ ժողովրդավարություն, եւ ոչ ոք օրենքից վեր չէ» եւ թվարկել է այն մեղադրանքները, որոնց համար Սաակաշվիլին արդեն դատապարտվել է վեց տարվա ազատազրկման, եւ մեղադրանքները, որոնց վերաբերյալ դատավարությունները դեռեւս ընթացքի մեջ են:

Ավելի վաղ Եվրախորհրդարանը բանաձեւ էր ընդունել՝ Վրաստանի իշխանություններից պահանջելով բանտից ազատ արձակել նախկին նախագահ Միխեիլ Սաակաշվիլիին։

Միխեիլ Սաակաշվիլին ձերբակալվել էր 2021 թվականի աշնանը, երբ ապօրինի հատել էր սահմանը եւ վերադարձել Վրաստան։ Կալանավայրում գտնվելու ժամանակ նրա առողջական վիճակը վատացել է։