Իրանը պաշտոնապես նոր մասնավոր ավիաընկերություն է գործարկել՝ հակառակ պատժամիջոցներին

Իրանը նոր մասնավոր ավիաընկերություն է գործարկել՝ հակառակ ԱՄՆ պատժամիջոցներին, որոնք ուղղված են երկրի քաղաքացիական ավիացիայի ոլորտին, հաղորդում է Mehr լրատվական գործակալությունը:

Իրանի զբոսաշրջության նախարարության բարձրաստիճան պաշտոնյաներն ուրբաթ ուշ երեկոյան մասնակցել են «Յազդ Էյր» մասնավոր ավիաընկերության մեկնարկի արարողությանը, որը տեղակայված է Յազդում՝ Իրանի կենտրոնական պատմական քաղաքում:

Արարողությունը տեղի է ունեցել այն բանից հետո, երբ Թեհրանի մայրաքաղաքից «Յազդ Էյր» ավիաընկերության առաջին չվերթը վայրէջք է կատարել Յազդի Շահիդ Սադուգի օդանավակայանում։

Ավիաընկերությունը կօգտագործի երկու Airbus A310 ինքնաթիռներ միջազգային ուղղություններով թռիչքներ իրականացնելու համար, որոնք կթռչեն Իրաքի Նաջաֆ, Դուբայ, Ստամբուլ եւ Մումբայ: Երկու բրիտանական Aerospace 146 կարճ հեռավորությունների ինքնաթիռներն էլ նախատեսված են ներքին թռիչքների համար:

IRNA պետական լրատվական գործակալության հաղորդման համաձայն, մասնավոր ներդրողները «Յազդ Էյր»-ի գործարկման համար հատկացրել են մոտ 10 տրիլիոն ռիալ (մոտ 22 միլիոն դոլար):

Նշվում է նաեւ, որ ընկերությունն իր գործունեության առաջին երկու ամիսների ընթացքում հույսը դնելու է Իրանի երկրորդ խոշորագույն ավիաընկերության՝ Mahan Air-ի ծառայությունների վրա, այնուհետեւ մոտ 70 աշխատակից հավաքագրելուց հետո բացելու է սեփական գրասենյակները:

Իրանի խորհրդարանի զբոսաշրջության հանձնաժողովի ղեկավար Մոհամմադ Ռեզա Դաշտին ասել է, որ «Յազդ Էյր»-ը ընդլայնվելու լուրջ ծրագրեր ունի՝ դառնալով Իրանի ամենահուսալի ավիաընկերություններից մեկը:

«Յազդ Էյր»-ի գործարկումը կայացել է՝ հակառակ իրանական ավիացիոն արդյունաբերության դեմ ԱՄՆ-ի մի շարք աննախադեպ պատժամիջոցներին:

Պատժամիջոցների համաձայն իրանական ավիաընկերություններին արգելվել է գնել նոր ինքնաթիռներ կամ ինքնաթիռներ վերանորոգելու համար անհրաժեշտ մասեր: