Իրանի ԻՀՊԿ ՌԾՆ-ն իր ուղղաթիռները զինել է տեղական արտադրության ականներով

Իսլամական հեղափոխության պահապանների կորպուսի (ԻՀՊԿ) ռազմածովային նավատորմն իր ուղղաթիռները զինել է ծովային տարբեր ականներով, տեղեկացրել է Tasnim-ը։

Իրանի պետական հեռուստատեսությամբ ցուցադրվող վավերագրական ֆիլմում պատկերված է, թե ինչպես են ԻՀՊԿ ՌԾՈւ-ի ծովային ականներով զինված ուղղաթիռները կարողանում իրականացնել ծովային գործողություններ։

ԻՀՊԿ ռազմածովային նավատորմի Մի-17 ուղղաթիռներն այժմ կարող են միջոցներ կիրառել հակառակորդի սուզանավերի դեմ։

Իրանի հեռուստատեսությունը ցուցադրել է կադր, որտեղ երեւում է, թե ինչպես է Մի-17 ուղղաթիռը տեղական արտադրության «Մահամ-II» ծովային ականներ նետում Իրանի ափերի մոտ։

Իրանական ծովային ականը, որը 350 կիլոգրամ պայթուցիկ է պարունակում, ունի ձայնային եւ մագնիսական սարքավորումներ։ «Մահամ-II»-ը տեղակայվում է ծովում, 10-50 մետր հեռավորության վրա, եւ կարող է խոցել մինչեւ 250 տոննայանոց եւ 4-15 հանգույց արագությամբ նավարկող տարբեր նավեր եւ սուզանավեր։

ԻՀՊԿ ռազմածովային ուժերի ուղղաթիռները զինված են «Noor» հականավային թեւավոր հրթիռներով, հեռահարությունը՝ 120 կիլոմետր, օդային բազավորման «Qader» հրթիռներով, հեռահարությունը՝ 200 կիլոմետր, եւ 57 միլիմետր տրամաչափի «С-5» հրթիռային կայանքներով։