Իսրայելական որոնողափրկարարական խումբը լքում է Թուրքիան «անվտանգության էական սպառնալիքի» պատճառով

Իսրայելական որոնողափրկարարական «United Hatzalah» խումբը հեռանում է Թուրքիայից՝ վեց օր տեղում մնալուց հետո՝ խմբի դեմ «անվտանգության զգալի սպառնալիքի» պատճառով, հաղորդում է CNN-ը՝ վկայակոչելով խմբի հայտարարությունը։

«United Hatzalah»-ի գործադիր տնօրեն Էլի Փոլակը եւ օպերատիվ գծով փոխնախագահ Դով Մեյզելը ասել են, որ իրենք «հետախուզական տեղեկատվություն են ստացել իսրայելական պատվիրակության համար հստակ եւ անմիջական սպառնալիքի մասին, եւ մենք պետք է առաջին հերթին դնենք մեր անձնակազմի անվտանգությունը»:

«Մենք գիտեինք, որ որոշակի մակարդակի ռիսկ կա մեր թիմը Թուրքիայի այս տարածք ուղարկելու մեջ, որը մոտ է սիրիական սահմանին, սակայն մենք անհրաժեշտ քայլեր ենք ձեռնարկել՝ մեղմելու սպառնալիքը՝ հանուն կյանքեր փրկելու մեր առաքելության», - ասել է Մեյզելը:

Որոշումն ընդունվել է «Իսրայելի պաշտպանության ուժերի ղեկավարների, ներքին ճակատի հրամանատարության եւ որոնողափրկարարական ստորաբաժանումների հետ համատեղ գնահատումից հետո, որը տեղի է ունեցել շաբաթ երեկոյան», - ասել են նրանք:

Խմբի մեկնման արագության եւ «անվճար ինքնաթիռների բացակայության» պատճառով ամերիկացի հանրապետական ​​հանգուցյալ Շելդոն Ադելսոնի այրին՝ Միրիամ Ադելսոնը, նվիրաբերել է իր անձնական ինքնաթիռը՝ թիմը կիրակի օրը Իսրայել վերադարձնելու համար:

Իսրայելական երկրորդ օգնության խումբը՝ IsraAID-ը, շարունակում է գործել Թուրքիայում։

Հիշեցնենք, որ ավելի վաղ Ավստրիայից եւ Գերմանիայից ժամանած փրկարարական խմբերը ժամանակավորապես դադարեցրել էին իրենց աշխատանքը Թուրքիայում՝ հայտարարելով «անվտանգության ռիսկերի» եւ «անհայտ խմբերի» միջեւ բախումների մասին։