Երկրաշարժի հետեւանքով Թուրքիայում եւս մեկ հայ է զոհվել. Արա Գոչունյան

Թուրքիայում տեղի ունեցած երկրաշարժի հետեւանքով զոհվել է չորրորդ հայը, նա Իսքենդերուն քաղաքից է, ինքնությունն առայժմ հայտնի չէ։ Այս մասին NEWS.am-ի հետ զրույցում ասաց Ստամբուլում հրապարակվող «Ժամանակ» թերթի գլխավոր խմբագիր Արա Գոչունյանը:

«Երեկ պատրիարքարանում խորհրդակցության ժամանակ հաղորդվեց, որ Իսքենդերուն քաղաքում հայ համայնքից մեկ զոհ կա, իսկ փլատակների տակ մնացած մյուս մարդկանցից տեղեկություն չկա»,– նշեց Արա Գոչունյանը:

Ավելի վաղ հաղորդել էինք, որ Թուրքիայի Իսքենդերուն քաղաքում երեք հայ շարունակում են մնալ փլատակներում։

Հիշեցնենք՝ Թուրքիայում տեղի ունեցած աղետալի երկրաշարժի հետեւանքով Մալաթիայում զոհվել էին ազգությամ հայ ամուսիններ եւ նրանց մանկահասակ երեխան։

Արա Գոչունյանի խոսքով՝ հայ համայնքը աղետյալներին օգնություն է հասցնում։

«Հայաբնակ համայնքներում հետցնցումներից հետո մարդիկ ի վիճակի չեն այս պահին իրենց բնակարանները մտնել։ Հավաքվում են գյուղի հրապարակում, այնտեղ են ապրում, այդ մարդկանց կարիքների դիմագրավման հարցերով է այժմ զբաղվում հայ համայնքը»,– ասաց Արա Գոչունյանը:

Վերջին տվյալով, Թուրքիայում տեղի ունեցած ավերիչ երկրաշարժի հետեւանքով Թուրքիայում եւ Սիրիայում զոհերի թիվը հասել է 6234–ի, վիրավորներինը՝ 37 011–ի։

Հիշեցնենք, որ փետրվարի 6–ին` ժամը 05.17–ին, Թուրքիայի Ղահրամանմարաշ գավառում երկրաշարժ է տեղի ունեցել, որն ավերածությունների է հանգեցրել մի շարք քաղաքներում։ Երեւանի ժամանակով 14։24-ին եւ 14։36-ին եւս 2 ուժգին երկրաշարժ է գրանցվել։ Էպիկենտրոնային գոտում ստորգետնյա ցնցման ուժգնությունը կազմել է 10-11 բալ: Երկրաշարժից 10 նահանգ է տուժել, որոնց ընդհանուր բնակչությունը մոտ 13 միլիոն է կազմում: