Բոլթոնն անխնա քննադատել է Թուրքիային և Էրդողանին
Թուրքիայի անդամակցությունը ՆԱՏՕ-ին 2023 թվականին կարող է հարցականի տակ դրվել, քանի որ Անկարան չի ցանկանում կոշտ հակառուսական դիրքորոշում որդեգրել ուկրաինական հակամարտության հարցում։
Նման կարծիք է հայտնել ԱՄՆ-ի 45-րդ նախագահ Դոնալդ Թրամփի ազգային անվտանգության հարցերով նախկին խորհրդական Ջոն Բոլթոնը։ Նրա կարծիքով, առաջիկա ամիսներին «Արևմուտքի միասնությունն ու վճռականությունը» գործնականում իսկապես փորձության կենթարկվեն։
«Ֆինլանդիան և Շվեդիան ապշեցուցիչ որոշում են կայացրել միանալ ՆԱՏՕ-ին, սակայն Ռուսաստանի առևտրային և ռազմական գործընկերները դեռևս չեն լքել նրան հարկ եղած պահին, ցավոք, ներառյալ Թուրքիան, որի անդամակցությունը ՆԱՏՕ-ին պետք է հարցականի տակ դրվի 2023 թվականին, եթե նախագահ Ռեջեփ Թայիփ Էրդողանը հավանաբար ընտրակեղծիքի միջոցով վերընտրվի»,- գրել է Բոլթոնը The Daily Telegraph-ի հրապարակած հոդվածում։
Հավելենք, որ Թուրքիայում նախագահական ընտրությունները նախանշված են այս տարվա հունիսին։