Իրանում մահապատժի են ենթարկել անկարգությունների մասնակցին 2 իրավապահի սպանելու համար

Իրանում մահապատժի է ենթարկվել անկարգությունների մասնակիցը, որը մեղավոր է ճանաչվել անվտանգության ուժերի երկու անդամների վրա հարձակվելու և նրանց սպանելու մեջ։ Այս մասին տեղեկանում ենք CNN-ի հրապարակումից:

Հաղորդվում է, որ մահապատժի ենթարկվածը՝ Մաջիդռեզա Ռահնավարդը, նոյեմբերի 17-ին Մաշհադ քաղաքում դանակով մահացու վիրավորել Է երկու ուժայինների և փախել, իսկ ճանապարհին վիրավորել է 4 մարդու: Ռահնավարդին Մաշհադում հրապարակային կերպով կախաղան են բարձրացրել այսօր առավոտյան: Նա երկրորդ մարդն է, որ մահապատժի է ենթարկվում 2022 թ.-ի ցույցերի առնչությամբ: Լրատվամիջոցը հիշեցնում է, որ դեկտեմբերի 8-ին մահապատժի էր ենթարկվել Մոհսեն Շեքարին:

Բողոքի ակցիաների ընթացքում ևս մի քանի իրանցի է մահապատժի դատապարտվել: Իրանում բողոքի ակցիաները սկսվել են սեպտեմբերից՝ 22-ամյա քուրդ աղջկա՝ Մահսա Ամինիի հուղարկավորությունից հետո. նա ձերբակալվել էր բարքերի ոստիկանության կողմից գլխաշորը սխալ կրելու համար և նրանց հսկողության տակ գտնվելու ընթացքում մահացել էր:

Ըստ պաշտոնական վարկածի՝ հարցաքննության ժամանակ Ամինին սրտի նոպա էր ունեցել, որից մահացել էր։ Սակայն սոցցանցերում տեղեկություն Էր տարածվել, թե Ամինին ծեծի է ենթարկվել ոստիկանների կողմից։ Հոկտեմբերի 7-ին Իրանի դատաբժշկական կազմակերպությունը պաշտոնական զեկույց էր հրապարակել աղջկա մահվան պատճառների մասին, որտեղ նշված Էր, որ նրան վնասվածքներ չեն պատճառվել: Իրանի իշխանությունները երկրում տեղի ունեցող խռովությունները հրահրելու մեջ բազմիցս մեղադրել են արևմտյան երկրներին՝ նշելով, որ նրանք ցույցերն օգտագործում են Իրանի ներքին գործերին միջամտելու համար: