Հայաստան խմբակցությունն Իրանի հետ ավելի սերտ կապերի կողմնակից է. Գեղամ Նազարյան

Հոկտեմբերի 10 ին Հայաստան-Իրան խորհրդարանական խմբի Թեհրան կատարած այցի շրջանակում, «Հայաստան» խմբակցության պատգամավոր Գեղամ Նազարյանը Իրանի մեջլիսի Իրան-Հայաստան բարեկամական խմբի ղեկավար Մեհդի Ֆարշադանի հետ հանդիպման ժամանակ ընդգծել է, որ «Հայաստան» խմբակցությունը հանդես է գալիս Իրանի հետ ավելի սերտ եւ խորքային հարաբերությունների հաստատման օգտին։

Գեղամ Նազարյանը մասնավորապես նշել է. «Իրանը հայ ժողովրդի կողմից ընկալվում է եղբայր երկիր, իրանցիները` եղբայրներ: Վստահ եմ, որ Իրանը Հայաստանը եւս ընկալում է եղբայր երկիր եւ հարեւան, հայերին՝ եղբայր ժողովուրդ: Այն կարգավիճակը, որ դարեր շարունակ ունեն հայերն Իրանում դրա լավագույն վկայությունն է: Այն հարաբերությունները, որ ստեղծվեցին 1991թ. հետո Հայաստանի եւ Իրանի միջեւ դրա հերթական ապացույցն է: Իննսունականներին Իրանից Հայաստան մտնող ճանապարհը համարում էինք կյանքի ճանապարհ:

Մենք հազարամյա հարեւաններ ենք: Աշխարհում նման վաղեմի երկու այլ հարեւաններ չկան: Մենք հիշում ենք Կյուրոս Մեծի եւ Երվանդ արքայի համատեղ փառապանծ հաղթանակները: Մեր մեջ եթե հազարմյակների ընթացքում եղել են վեճեր, բախումներ, պատերազմներ, ապա դրանք եղել են եղբայրների միջեւ հարաբերությունների ճշտում:

Հայաստանի համար անկախության վերանվաճումից՝ 1991թ. հետ էլ Իրանը մեր եղբայր հարեւան երկիրն է: Ես ինքս ներկայացնում եմ, «Հայաստան դաշինքը», խմբակցությունը, որը գլխավորում է Հայաստանի երկրորդ նախագահ Ռոբերտ Քոչարյանը: Հայ-իրանական հարաբերությունների նորագույն պատմության ամենանշանակալի իրադարձություններից մեկն էլ Իրան-Հայաստան գազամուղի կառուցումն էր:

2006թ. հուլիսի 5-ին Ռոբերտ Քոչարյանն աշխատանքային այցով մեկնում է Իրան, որտեղ հանդիպում է Իրանի նախագահ Մահմուդ Ահմադինեժադի հետ: 2007-ի մարտի 19-ին Հայաստանի եւ Իրանի նախագահների մասնակցությամբ տեղի է ունենում գազատարի բացման արարողությունը, իսկ 2008-ի վերջին ավարտվում է Իրան-Հայաստան գազատարի երկրորդ հատվածի շինարարությունը:

Այս գազատարի կառուցմանը դեմ էին շատ ու շատ երկրներ, բայց երբ հայ եւ իրանցի ժողովուրդները, Հայաստանն ու Իրանը համատեղ որոշում են կայացնում, այն անպայման իրականություն է դառնում:

Մի քանի շաբաթ առաջ Ռոբերտ Քոչարյանն անդրադառնալով հայ-իրանական ներկա հարաբերություններին նշել է. «Բացի Հայաստանից միակ երկիրը, ում համար Սյունիքը կարեւոր է, Իրանն է, ինչը դժվար չէր պատկերացնել եւ Իրանի հետ հարաբերությունների կարգավորման համար քայլեր անել: Իրանն այն պետությունը չէ, որի վրա մատ թափ տալով կարելի է կանգնեցնել, եթե նա հետապնդում է իր ազգային շահը»։

Ռոբերտ Քոչարյանը եւ «Հայաստան» խմբակցությունը համոզված են, որ հիմա էլ ուշ չէ Իրանի հետ առավել սերտ հարաբերություններ հաստատելու գործընթաց սկսել:

Լիահույս եմ, որ ամենամոտ ապագայում Հայաստանն ու Իրանն իրենց հարաբերությունները կդարձնեն էլ ավելի սերտ, բարեկամական եւ եղբայրական»:

Իր հերթին Մեհդի Ֆարշադանին շեշտեց, որ անչափ ուրախ է, որ Հայաստանյան խորհրդարանական ընդդիմությունը հանդես է գալիս նման դիրքերից եւ Իրան-Հայաստան հարաբերությունների ջատագովն է։ Նա շեշտեց, որ Իրանը պատրաստ է ամենասերտ եւ համակողմանի հարաբերությունները հաստատել Հայաստանի հետ։