Իրադարձությունները ցույց տվեցին, որ ո՛չ Բաքուն, ո՛չ Երեւանը չեն ուզում լայնամասշտաբ էսկալացիա․ Ալիեւ

Սահմանին հրադադարի ռեժիմի պահպանումը խոսում է այն մասին, որ ո՛չ Բաքուն, ո՛չ Երեւանը չեն ուզում լայնամասշտաբ էսկալացիա։ Այս մասին Սամարղանդում ՌԴ նախագահ Վլադիմիր Պուտինի հետ հանդիպմանն ասել է Ադրբեջանի նախագահ Իլհամ Ալիեւը, հաղորդում է «ՌԻԱ Նովոստին»։

Ալիեւը շնորհակալություն է հայտնել Պուտինին՝ հայ-ադրբեջանական սահմանին էսկալացիային օպերատիվ արձագանքելու համար։ «Կցանկանայի իմ երախտագիտությւոնը հայտնել իրադարձություններին օպերատիվ արձագանքելու համար։ Բախումները շարունակվել են ութ ժամ, եւ այն, որ դրանք դադարեցվել են, խոսում է այն մասին, որ ո՛չ Բաքուն, ո՛չ Երեւանը չեն ուզում լայնամասշտաբ էսկալացիա»,-ասել է Ալիեւը։

Ալիեւը նշել է, որ, ցավոք, սահմանային կոնֆլիկտներ լինում են, եւ վերջին իրադարձությունները ուղեկցվեցին երկու կողմերից բազմաթիվ զոհերով, սակայն «հաջողվեց կայունացնել իրավիճակը»։

Ալիեւը ողջունել է Ռուսաստանի ջանքերը։ «Եվս մեկ անգամ ցանկանում եմ նշել, որ Ադրբեջանը կատարում է Լեռնային Ղարաբաղում երկրորդ պատերազմից հետո Ռուսաստանի, Ադրբեջանի եւ Հայաստանի կողմից ստորագրված եռակողմ պայմանագրի դրույթները, եւ մենք կանենք ամեն ինչ, որպեսզի Կովկասում իրավիճակը կայուն լինի»,-եզրափակել է Ալիեւը։