Էրդողանը սպառնում է փակել Իրաքյան Քրդստանի հետ օդային և ցամաքային սահմանները

Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան շուտով կսկսի առաջին պատժամիջոցները կիրառել Իրաքյան Քրդստանի դեմ՝ փակելով երկրի հետ օդային և ցամաքային սահմանները, այս մասին հաղորդում է CNN Turk-ը:

«Մենք չենք թողնի, որ մեր տարածաշրջանն ու Թուրքիայի սահմանները վտանգի տակ հայտնվեն ինչ-որ մեկի մանկական երազանքների իրականացման համար (նկատի ունի Իրաքյան Քրդստանի ղեկավար Մասուդ Բարզանիին, որն ավելի վաղ ասել էր, որ անկախ Քրդստանն իր մանկության ամենամեծ երազանքն է եղել - tert.am): Այստեղ հանրաքվեով ոչինչ չի վերջանում, արդյունքը դեռ հիմա նոր պիտի տեսնեք»,- սպառնացել է Թուրքիայի նախագահը:

Ըստ նրա՝ Իրաքյան Քրդստանի ղեկավարությունն անհեռատես է, սակայն ժամանակի ընթացքում կհասկանա, որ այլ ելք չունի:

«Մի կողմից Իրանը, հյուսիսում Թուրքիան, հարավում Բաղդադը, արևմուտքում Սիրիան… Ի՞նչ եք անելու: Ո՞ւր եք գնալու, ինչպե՞ս եք դուրս գալու: Բոլոր օդային սահմանները փակվելու են: Շուտով ցամաքային սահմանն էլ կփակենք: Մի երկրի ղեկավար չի կարող այդքան երեխայական ձևով դա անել (նկատի ունի հանրաքվեի անցկացումը- Tert.am)», - ասել է Էրդողանը:

Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:

Իրաքի վարչապետ Հայդեր ալ Աբադին հանրաքվեն անվանել է հակասահմանադրական և հայտարարել է, որ Իրաքն այն չի ընդունելու: Իրաքի իշխանությունները նաև հայտարարել են, որ բանակցություններ չեն վարելու Քրդստանի շրջանային կառավարության հետ քվեարկության արդյունքների վերաբերյալ: Հանրաքվեի անցկացման դեմ են հանդես եկել Թուրքիան և Իրանը, ինչպես նաև ԱՄՆ-ն և ՄԱԿ-ը: