Պուտինն ու Էրդողանը քննարկել են Զապորոժյեի ատոմակայանի շուրջ ստեղծված իրավիճակը եւ հացահատիկի գործարքը
Ռուսաստանի եւ Թուրքիայի նախագահներ Վլադիմիր Պուտինը եւ Ռեջեփ Թայիփ Էրդողանը հեռախոսազրույց են ունեցել, որում հաստատել են երկրների միջեւ առեւտրատնտեսական կապերն ընդլայնելու մտադրությունը, այդ թվում՝ էներգետիկ հատուկ նախագծերի խթանումը։ Այս մասին հայտնում է Կրեմլի մամուլի ծառայությունը։
Բացի այդ, Էրդողանը ցավակցություն է հայտնել ԽՍՀՄ նախկին նախագահ Միխայիլ Գորբաչովի մահվան կապակցությամբ։
Նախագահները քննարկել են իրավիճակն Ուկրաինայում. զրույցի ընթացքում Էրդողանը նշել է Ռուսաստանի կառուցողական դերը ՄԱԳԱՏԷ-ի առաքելությունը Զապորոժիեի ատոմակայանում կազմակերպելու գործում։ ԱՆդրադարձ է եղել նաեւ հացահատիկի եռակողմ գործարքի կազմակերպմանը։
Պուտինի եւ Էրդողանի նախորդ բանակցությունները տեղի են ունեցել օգոստոսի 5-ին Սոչիում։ Բանակցություններից հետո պետությունների ղեկավարները համատեղ հայտարարություն են ընդունել, ինչպես նաեւ պայմանավորվել են սկսել Թուրքիա ռուսական գազի մատակարարումների մասնակի վճարումը ռուբլով, գրում է «Կոմերսանտ»-ը։