Դեն Բիլզերյանը նկարահանել է իրեն Լաս Վեգասի հարձակումից փախչելիս (տեսանյութ)

Instagram սոցցանցի հայազգի աստղ Դեն Բիլզերյանը ներկա է եղել Լաս Վեգասում տեղի ունեցած հարձակմանը: Նա սոցիալական ցանցերում տեսանյութ է տեղադրել, որում փախչում է Route 91 Harvest երաժշտական փառատոնի ժամանակ հնչող կրակոցներից, հայտնում է The Daily Mail-ը:

Բիլզերյանի խոսքով՝ նա տեսել է, թե ինչպես է փամփուշտը դիպչում աղջկա գլխին:

Համացանցում հրապարակվել են նաև այլ կադրեր, որտեղ լսվում է համերգի ընթացքում սկսված կրակահերթի ձայնը:

Ավելի վաղ հաղորդվել է, որ Լաս Վեգասում բացօթյա համերգի ժամանակ բացված կրակահերթի հետևանքով զոհվել է ավելի քան 20 մարդ, 100 հոգի վիրավորվել է:

Քլարկ շրջանի շերիֆ Ջոզեֆ Լոմբարդոյի խոսքով՝ ոստիկանները կասկածյալին հայտնաբերել են Mandalay Bay հյուրանոց-խաղատան 32-րդ հարկում: Իշխանությունների հաղորդմամբ՝ տղամարդը սպանված է:

Հայտնի է, որ անհայտ անձը կրակ է բացել քանթրի երաժշտության փառատոնի ժամանակ: Սոցիալական մեդիաներում հրապարակված տեսանյութերում երևում է, թե ինչպես են կրակոցները սկսվում երաժշտի կատարման ընթացքում: Կրակոցները մոտ 10 վայրկյան շարունակվում են, մինչև երաժշտությունը դադարում է: Շուտով ևս մի կրակահերթի ձայն է լսվում: