ԵԽ նախարարների կոմիտեն կքննարկի Ադրբեջանի կողմից ՄԻԵԴ որոշումների կատարումը

Եվրոպայի խորհրդի նախարարների կոմիտեն հունիսի 8-10-ը կայանալիք նիստում կքննարկի մի շարք երկրների, այդ թվում՝ Ադրբեջանի կողմից ՄԻԵԴ որոշումների կատարման հարցը։

Ինչպես հայտնում է Turan-ը, ԶԼՄ-ների իրավունքների խմբի ղեկավար Խալիդ Աղալիեւը հայտարարել է, որ հանդիպմանը կքննարկվեն երկու խմբի՝ «Խադիջի Իսմայիլի» եւ «Անարա Մամեդլիի» 8 որոշումները։ Առաջին խմբին են վերաբերում լրագրողուհու բողոքների վերաբերյալ ՄԻԵԴ-ի կողմից ընդունված երկու որոշումներ։ Դրանք առնչվում են դիմումատուի անձնական կյանքի անձեռնմխելիության եւ ազատ խոսքի իրավունքների խախտմանը։

Ադրբեջանի կառավարությունը Եվրոպայի խորհրդին տեղեկացրել է, որ իրավապահ մարմինները քրեական գործ են հարուցել լրագրողուհու անձնական կյանքին միջամտելու եւ նրա ինտիմ տեսանյութերի տարածման առնչությամբ։ Սակայն «չնայած բազմաթիվ քննչական եւ օպերատիվ-որոնողական միջոցառումներին՝ հնարավոր չի եղել բացահայտել մեղավորներին, եւ գործը փակվել է 2017 թվականին»։

Միեւնույն ժամանակ, կառավարությունն իր պատասխանում նշել է, որ Իսմայիլովային փոխհատուցման գումարները երկու դեպքում էլ վճարվել են հաշվեգրված տոկոսներով։

Կառավարությունը նաեւ նշել է, որ անհրաժեշտ քայլեր է ձեռնարկել լրագրողների անձնական եւ ընտանեկան կյանքը ու խոսքի ազատությունը պաշտպանելու համար։ Միաժամանակ իշխանությունները տեղեկացրել են ԶԼՄ-ների մասին նոր օրենքի ընդունման մասին, որը «լրագրողների ազատության լայն հնարավորություններ է բացում»։

Ինչ վերաբերում է «Անար Մամեդլի խմբի» գործերին, ապա սրանք ՄԻԵԴ-ի վճիռներն են իրավապաշտպանների եւ ակտիվիստների՝ Անար Մամեդլիի, Ինթիգամ Ալիեւի, Մամեդ Ազիզովի, Շահին Նովրուզլուի, Գիյաս Իբրահիմովի եւ Բայրամ Մամեդովի գործերով, ինչպես նաեւ Լեյլա եւ Արիֆ Յունուսների գործով, որտեղ ճանաչվում են Մարդու իրավունքների եվրոպական կոնվենցիայի 18-րդ հոդվածի իրավունքները։ Այսինքն՝ ՄԻԵԴ-ը համարել է, որ նրանք ձերբակալվել են իշխանությունների քննադատության եւ քաղաքական գործունեության պատճառով։ Չնայած այդ անձանց նկատմամբ իրականացվող հետապնդումների անօրինականության ճանաչմանը, Ադրբեջանի իշխանությունները դեռ չեն արդարացրել նրանց։

Կառավարությունը նախարարների կոմիտեին ուղղված պատասխանում նշում է, որ բոլոր դիմողների նկատմամբ քրեական հետապնդումն արդեն դադարեցվել են, եւ նրանց համար այլեւս բացասական իրավական հետեւանքներ չկան։

Հիշեցնենք, որ Բայրամ Մամեդովը խեղդվել էր անցյալ տարի Թուրքիայում՝ չպարզված հանգամանքներում։