Պետք է նորից երկխոսություն սկսենք. Կարո Փայլանը՝ հայ-թուրքական հարաբերությունների մասին

2009-ի թուղթը կա, պետք է 2017 թ. մաքուր թուղթ հանենք, որ նորից երկխոսություն սկսենք, գիտեմ, որ դա շատ դժվար է, որովհետև թուրքերի մեջ ազգայնական մտածողությունն ուժեղ է, և պայմանները հիմա լավ չեն, բայց այս տեսակ հարաբերություններում անգամ երկխոսություն է պետք: Այսպիսի հայտարարություն է արել Թուրքիայի խորհրդարանի պատգամավոր Կարո Փայլանը «Կենտրոն» հեռուստաընկերության «Ուրվագիծ» հաղորդման եթերում՝ անդրադառնալով Հայաստանի և Թուրքիայի միջև 2009թ. Ցյուրիխում ստորագրած արձանագրություններին:

Հիշեցնենք, որ օրեր առաջ նախագահ Սերժ Սարգսյանը ՄԱԿ-ի ամբիոնից հայտարարեց, որ եթե Թուրքիան մինչև գարուն չվավերացնի Ցյուրիխյան արձանագրությունները, Հայաստանն այն կհամարի առ ոչինչ:

Կարո Փայլանը չի կարող ասել՝ ճի՞շտ որոշում է սա, թե ոչ. «Կարող եմ ասել, որ 2009 թ. Թուրքիան և Հայաստանը ստորագրեցին արձանագրությունները, բայց, ցավոք սրտի, Թուրքիան չկատարեց իր պարտավորությունը: Եվ վերջացավ երկխոսությունը: Կարևորն այն է, որ հիմա երկխոսություն չկա, և դռները փակ են»:

Անդրադառնալով այն հարցին, որ Թուրքիան սահմանի բացման հարցը կապում է Ղարաբաղի հարցի հետ և, քանի որ Ղարաբաղի հարցում առաջընթաց չկա, հայ-թուրքական երկխոսությունն արդյոք անժամկետ հետաձգվո՞ւմ է, Թուրքիայի խորհրդարանի պատգամավորն ասել է. «Հիմա Արցախի խնդրի համար Թուրքիան և Ադրբեջանը միասին են: Ալիևն ու Էրդողանը եղբայրություն են անում: Բայց ես ամեն անգամ ասում եմ, որ հայերն էլ թշնամի չեն, թշնամական են մտածողությունները: Ազգայնական մտածողություններ կան Թուրքիայում: Սա է խնդիրը: Եվ պետք է նորից ճերմակ, մաքուր թուղթ ունենանք»:

Նա տեղեկացրել է, որ կառավարող կուսակցությունում էլ այս ճանապարհին կողմ մարդիկ շատ քիչ են: Էրդողանն այժմ դաշինք է կազմել ազգայնական ուժերի հետ և թողել է իր ժողովրդավար ընկերներին: Այդ ժողովրդավար ընկերները նորից ուզում են, որ այս երկխոսությունը սկսվի: «Դավութօղլուն, Գյուլը, շատ ջանքեր թափեցին, որ կարողանան այս երկխոսությունը կայացնել, բայց ազգայնական ուժերը չեն ուզում Հայաստանի հետ կապ ունենալ, որովհետև ազգայնական ուժերը թշնամու կարիք ունեն, պետք է այդ քարտը գործածեն, որ Հայաստանը կամ հայ ազգը մեր թշնամին է»:

Կարո Փայլանը նշել է, որ իրենք և իրենց ժողովրդավար կուսակցությունը, ժողովրդավար ընկերներն ասում են՝ ոչ, ազգերը թշնամի չեն կարող լինել, մտածողությունն է թշնամական, դրա համար պետք է պատասխանատվություն վերցնեն այդ տեսակ մտածողության համար:

«Ամեն տեղ ազգայնականներն իրար հետ ուժ են չափում, եթե թուրքերն ազգայնական լինեն, հայերն էլ ավելի ազգայնական պիտի լինեն, քրդերն էլ ավելի ազգայնական պիտի լինեն»,-ասել է Թուրքիայի խորհրդարանի պատգամավորը: