«Այս օրը հանդիսանում է ազգային ինքնամփոփման հնարավորություն նաև հենց Թուրքիայի համար»
Հունաստանում Հայաստանի դեսպանությունը ֆեյսբուքյան էջում հրապարակել է Կիպրոսի Հանրապետության Ներկայացուցիչների պալատի Ժողովրդավարական Ֆրակցիա – Համագործակցություն կուսակցության ուղերձը՝ Հայոց Ցեղասպանության 107-րդ տարելիցի կապակցությամբ.
«Մենք դատապարտում ենք Թուրքիայի էթնիկ զտումների և նվաճողական քաղաքականությունը՝ վերահաստատելով մեր աջակցությունը հայ ժողովրդին:
Ապրիլի 24-ը՝ Հայոց Ցեղասպանության զոհերի հիշատակի օրը՝ իր տեղն է զբաղեցնում մարդկության պատմության սև էջերի մեջ։
107 տարի առաջ թուրքերը հանցանք գործեցին մի ամբողջ ժողովրդի նկատմամբ: 1915 թվականի ապրիլի 24-ից սկսած՝ Օսմանյան իշխանությունների կողմից Կոստանդնուպոլսի հայ մտավորականների և համայնքի ղեկավարների ձերբակալությունից հետո, մեկուկես միլիոն հայ տեղահանվեց, կոտորվեց կամ մահապատժի ենթարկվեց՝ բնաջնջման արշավի ընթացքում:
Որպես Ժողովրդավարական Ֆրակցիա – Համագործակցություն կուսակցություն` դատապարտում ենք Թուրքիայի էթնիկ զտումների և նվաճողական քաղաքականությունը և վերահաստատում մեր, ինչպես նաև ողջ Կիպրոսի ժողովրդի աջակցությունը հայ ժողովրդին՝ միջազգային հանրության կողմից Ցեղասպանության դատապարտման և ճանաչման գործում։
Անցյալ տարի, այս օրը, Հայոց ցեղասպանության ճանաչումն ԱՄՆ-ի նախագահի ու ԱՄՆ-ի Ներկայացուցիչների պալատի կողմից ցույց տվեց ճանապարհը, որպեսզի, ի վերջո, քաղաքակիրթ մարդկությունը հստակ ուղերձ հղի առ այն, որ աշխարհաքաղաքական, տնտեսական կամ այլ ժամանակավոր շահերից դուրս կա բարոյական և միջազգային իրավական կարգ, որը վեր է անօրինական նպատակահարմարություններից, բայց նաև տարբեր խաղերից։
Այս օրը հանդիսանում է ազգային ինքնամփոփման հնարավորություն նաև հենց Թուրքիայի համար, որն Ուկրաինա ռուսական ներխուժումից հետո համաշխարհային քաղաքականության մեջ խաղում է «խաղաղարարի» դերը և հավակնում է «խաղաղարարի» դերին: Եվ դա տեղի է ունենում այն ժամանակ, երբ Թուրքիան շարունակում է բռնազավթած պահել Կիպրոսի Հանրապետության տարածքի 37%-ը, Միջերկրական ծովի Արևելյան հատվածում հանդես է գալիս որպես ծովահեն, ուժեղ ներկայություն ունի Սիրիայում և Լիբիայում ու աջակցություն էր ցուցաբերել Արցախի դեմ ուղղված ադրբեջանական հարձակմանը։
Այսօր Թուրքիայի համար հնարավորություն է առերեսվելու միջազգային իրավունքի, ինչպես նաև համամարդկային և համընդհանուր սկզբունքների ու արժեքների հետ՝ հրաժարվելով իր ծայրահեղ վտանգավոր նվաճողական քաղաքականությունից»։