Խոզնավարում պատերազմից հետո թշնամուն է անցել 250 հա արոտավայր, 80 հա խոտհարք, 15 հա վարելահող. Գյուղը թերակղզի է դարձել

Սյունիքի մարզի Խոզնավար համայնքում պատերազմից հետո թշնամուն է անցել 250 հա արոտավայր, 80 հա խոտհարք, 15 հա վարելահող: NEWS.am-ի հետ զրույցում Խոզնավարի բնակիչ, նախկին համայնքապետ Վարո Գրիգորյանը պատմեց, որ գյուղը 3 կողմից շրջապատված է ադրբեջանական դիրքերով, գյուղից դուրս գալու միայն մեկ ճանապարհ կա, այն էլ թշնամու անմիջական նշանառության տակ է:

«Թշնամին 500-600 մետր հեռավորության վրա գտնվում ճանապարհից, ապահով չէ ճանապարհը: Գյուղն էլ թերակղզու նման շրջապատված է ադրբեջանցիներով, դիմացն էլ մերոնք են կանգնած»,-ասաց նա:

Անդրադառնալով վարչապետի առաջարկած հայելային հետ քաշման տարբերակին, նախկին գյուղապետը նշեց, որ հետ քաշվելու տեղ իրենք չունեն, կամ պետք է դուրս գան գյուղից. «Դա ճիշտ չէ, իմ կարծիքով, իրենք եկել տեղավորվել են, որ հետ գնալու լինեին, հիմա գնացել էին»:

Գյուղում իրավիճակը հանգիստ է, կրակոցներ չկան:

Նշենք, որ պատերազմից հետո Սյունիքի մարզում Խոզնավարից բացի սահմանամերձ են դարձել Վանատուրը, Խնածախը, Տեղը, Արավուսը, Կոռնիձորը եւ այլ գյուղեր: Սահմանամերձ համայնքերում գյուղացիները չեն կարողանում զբաղվել անասնապահությամբ եւ հողագործությամբ: