Չավուշօղլուն հայտարարել է, որ դիմել է Ռուսաստանին Ուկրաինայում մզկիթից թուրքերին տարհանելու հարցով
Անթալյայում դիվանագիտական ֆորումի ժամանակ Թուրքիայի ԱԳ նախարար Մեւլյութ Չավուշօղլուն հայտարարել է, որ Թուրքիայի իշխանությունները դիմել են ՌԴ ԱԳ նախարար Սերգեյ Լավրովին Մարիուպոլից Թուրքիայի քաղաքացիներին տարհանելու հարցում օգնելու համար, հաղորդում է «Ինտերֆաքս-ԱԲՆ»-ը:
«Թուրքիան տարհանում է իր քաղաքացիներին, որոնք ապաստան են գտել Մարիուպոլ քաղաքի մզկիթում»,-կիրակի նախարարի խոսքերը մեջբերում է «Սաբահ» պարբերականը:
«Նա ասել է, որ մզկիթը չի տուժել, իսկ Անկարան խնդրել է ՌԴ ԱԳ նախարար Սերգեյ Լավրովի աջակցությունը տարհանման հարցում»,-նշել է թերթը:
Չավուշօղլուն հավելել է, որ Ուկրաինայից ընդհանուր առմամբ տարհանվել է Թուրքիայի 14 հազար 480 քաղաքացի:
«Սաբահի» տվյալներով՝ Մարիուպոլում դեռեւս գտնվում է Թուրքիայի 86 քաղաքացի, որոնցից 30-ը՝ մզկիթում: