«Ադրբեջանական լվացքատուն». Մերկելի դաշնակիցը գումարներ է ստացել Ադրբեջանից

Ադրբեջանի կողմից եվրոպացի պաշտոնյաներին արված վճարումների վերաբերյալ բացահայտումները հասել են Գերմանիայի ընտրություններին: Պարզվել է, որ Գերմանիայի կանցլեր Անգելա Մերկելի մտերիմ դաշնակիցը ենթադրաբար գումարներ է ստացել Ադրբեջանից, գրում է The Guardian-ը:

Süddeutsche Zeitung-ի համաձայն՝ խորհրդարանի քրիստոնեա-դեմոկրատ անդամ Կարին Ստրենզն Ադրբեջանից ստացել է 7.000 եվրոյից մինչև 15.000 եվրո: Գումարը նրան ուղարկվել է նախկին գերմանացի խորհրդարանական և Ադրբեջանի լոբբինգով զբաղվող Էդուարդ Լինթների ստեղծած ընկերության միջոցով:

Սկանդալը սպառնում է ցնցել մինչ այժմ հանգիստ ընթացող նախընտրական արշավը, որի ընթացքում Մերկելի Քրիստոնեա-դեմոկրատական միությունը հաղթանակ ապահովելու ճանապարհին է:

Արտահոսած բանկային տվյալները ցույց են տալիս, որ Լինթները ստացել է ավելի քան 800.000 եվրո Մեծ Բրիտանիայում գտնվող ֆիկտիվ ընկերությունների միջոցով: Այս գումարի մի մասը վճարվել է Գերմանիայում և Բելգիայում այլ խորհրդարանականների: 2014 և 2015 թվականներին Ստրենզին վճարումներն ուղարկվել են Լինթների Line M-Trade ընկերության միջոցով:

The Guardian-ը գրում է, որ Ստրենզն Ադրբեջան է այցելել մի քանի առիթներով, այդ թվում՝ որպես ընտրությունների դիտորդ: Նա այժմ Գերմանա-հարավկովկասյան բարեկամության խմբի տնօրենն է: Նա իր կայքում Ադրբեջանի նախագահ Իլհամ Ալիևի հետ լուսանկար է հրապարակել՝ «Քաղաքականությունը կարող է տարբեր լինել» կարգախոսով:

Կայքը գրում է, որ Ստրենզն այժմ պետք է բացատրի, թե արդյոք հնարավոր է, որ վճարումներն ազդած լինեն Բեռլինում և Եվրոպայի խորհրդում, որի խորհրդարանական վեհաժողովի անդամն է, իր քվեարկությունների վրա:

2015 թվականի հունիսին Ստրենզը ԵԽԽՎ-ում քվեարկել է բանաձևի դեմ, որը կոչ էր անում Ադրբեջանին բաց թողնել իր քաղբանտարկյալներին: Նա Գերմանիայի միակ ներկայացուցիչն էր, ով դեմ էր քվեարկել բանաձևին: Ստրենզը նաև Ադրբեջանի ընտրությունների վերաբերյալ դրական եզրակացություն է տվել՝ ի դեմս այլ դիտորդների, որոնք քննադատություն էին հայտնել:

Ավելի վաղ հաղորդվել է, որ Եվրախորհրդարանը որոշել է հետաքննություն սկսել բրիտանական հեղինակավոր The Guardian պարբերականի և մեդիագործընկերների ջանքերի շնորհիվ բացահայտված «Ադրբեջանական լվացքատուն» անվանումով աղմկահարույց գործով:

եվրապատգամավորները հայտարարել են, որ Բաքուն փորձել է զարտուղի ճանապարհներով ներազդել եվրոպացի օրենսդիրների որոշումների վրա:

Նշվում է, որ «Ադրբեջանական լվացքատուն» ապօրինի ֆինանսական սխեմայի միջոցով Ադրբեջանի վերնախավը տևական ժամանակ ոչ միայն զբաղվել է փողերի լվացմամբ, այլև իր ազդեցությունն ավելացնելու նպատակով խոշոր գումարներ փոխանցել ադրբեջանական շահն առաջ տանող լոբբիստներին, ջատագովներին ու եվրոպացի քաղաքական գործիչներին:

Եվրապատգամավորները պահանջել են այս գործով համապարփակ հետաքննություն իրականացնել՝ պարզելու համար, թե Ադրբեջանի բռնատիրական ռեժիմն ինչպես է ապօրինի ճանապարհներով ազդել եվրոպացի քաղաքական գործիչների որոշումների վրա: Խոսքը վերաբերում է այն քաղաքական գործիչներին, որոնք 2013թ. Եվրոպայի խորհրդի խորհրդարանական վեհաժողովում (ԵԽԽՎ) դեմ են քվեարկել Ադրբեջանում մարդու իրավունքների ոտնահարումը դատապարտող զեկույցին: